Sosial sahədə vətəndaşların həyatına birbaşa təsir edəcək hansı yeni addımlar atıldı? Son bir həftə Azərbaycan və dünya gündəmində sosial müdafiə, məşğulluq, eləcə də insan hüquqları sahəsində bir sıra vacib addımlar atılıb və mühüm qərarlar açıqlanıb.

Azərbaycan üzrə sosial xəbərlər

Övladlığagötürmə prosedurlarının sadələşdirilməsi. Dövlət başçısının qəbul etdiyi yeni fərmana əsasən, övladlığagötürmə prosesində elektronlaşma genişləndirilib. Prosedurların kəskin şəkildə sadələşdirilməsi, bürokratik maneələrin aradan qaldırılması və uşaqların ailələrə verilməsi müddətinin qısaldılması hədəflənib.

Oktyabr ayında sosial ödənişlər. Dövlət Sosial Müdafiə Fondu (DSMF) tərəfindən oktyabr ayı üzrə pensiya, müavinət və təqaüdlərin ödəniş tarixləri açıqlanıb. Bakı, Sumqayıt və Abşeron rayonları üzrə pensiyalar oktyabrın 14-dək, respublikanın digər bölgələri üzrə oktyabrın 20-dək, ünvanlı dövlət sosial yardımları və təqaüdlər isə oktyabrın 23-dək tam ödəniləcək. Qeyd edək ki, son bir ildə sosial ödəniş qrafiki 1 həftəyə yaxın sürüşdürülüb, bu da əhalinin haqlı narazılığına səbəb olub. Sosial ödənişlərin gecikdirilməsi vətəndaşların banklar qarşısında kredit ödənişləri üzrə gecikmələrə səbəb olur bu isə öz növbəsində əlavə xərclər yaradır. Ümumilikdə d ə sosial ödənişlərin gecikdirilməsi əlavə xərclər, öhdəliklər və problemlər yaradır.

Proaktiv xidmətlər və əlillik təyinatında yeni statistikalar. Nazirliyin rəsmi hesabatına əsasən, ilin ilk 9 ayı ərzində 110 mindən çox şəxsə proaktiv (müraciətsiz, avtomatik) sosial təminat təyin olunub. Paralel olaraq, 40 minədək şəxsə əlillik dərəcəsi müəyyən edilib və Suriyadan repatriasiya olunan vətəndaşların növbəti qrupu üçün sosial reabilitasiya proqramlarına start verilib.

Aktiv məşğulluq və “PeşəFest-2026”. Keçən həftə “PeşəFest-2026” festivalına start verilib və yanvar-sentyabr göstəriciləri üzrə 410 min şəxsin aktiv məşğulluq tədbirləri ilə əhatə olunduğu açıqlanıb.

Qlobal sosial yeniliklər

Gender zorakılığı ilə mübarizədə qlobal aksiyalar (BMT / UNESCO)

UNESCO və müxtəlif beynəlxalq təşkilatlar zəif inkişaf etmiş və inkişafda olan ölkələrdə (məsələn, Afrika regionunda) femisidə (qadın qətllərinə) və gender əsaslı zorakılığa qarşı milli strategiyaların qəbulunu dəstəkləməyə başlayıb. Hüquqi müdafiə mexanizmlərinin sərtləşdirilməsi və ilkin profilaktika tədbirlərinin sosial proqramlara inteqrasiyası təmin edilir.

Avropada qaçqınların integrasiyası və sosial hüquqlar debatı

Avropa İttifaqında qaçqınların və miqrantların sosial inteqrasiyası, sosial müavinətlərə çıxış imkanları, insan hüquqları meyarları üzrə yeni tədqiqatlar və qanunvericilik təşəbbüsləri irəli sürülüb. Məqsəd miqrantlar arasında sosial bərabərsizliyi aradan qaldırmaqdır.

Qlobal əmək hüquqları və inflyasiya təzyiqi

Beynəlxalq Əmək Təşkilatı (BƏT) və müxtəlif ölkələrin həmkarlar ittifaqları inflyasiya fonunda minimum əməkhaqqı və sosial paketlərin yenidən baxılması istiqamətində dövlət proqramlarının hazırlanmasını intensivləşdiriblər.