“Günün sualı” rubrikasının növbəti sualı: “Yeməyə ən çox nə qədər pul xərcləmisiniz? – Buna dəyərdimi?”.

Yemək insanı ayaqda tutan əsas elementlərdən biri olduğu üçün hər birimiz üçün vacibdir. Sadəcə yeməyin sağlam olmasına və miqdarına diqqət yetirməliyik ki, sağlamlığımıza zərər vurmayaq.

Bundan başqa, yemək əlbəttə ki, dadlı və gözəl formada təqdim edilməlidir. Bəli, mən bu məsələlərdə biraz estetəm, yeməyin dadı ilə yanaşı, qoxusu, necə servis edildiyi mənim üçün önəmlidir.

Yemək bişirməyi sevirəm və bu işi yalnız gözəl əhva-ruhiyyədə olduğum zaman edirəm, özümü pis hiss etdikdə və ya çox üzüntülü olduqda xörək bişirmirəm ki, ailə üzvlərimi neqativ enerjimlə zəhərləməyim.

Evdən kənarda çox az qidalanıram və adətən ancaq fastfud yeyirəm, çünki kafe və restoranda hazırlanan ev yeməklərindən zövq ala bilmirəm. Bu yeməklər elə bilki “cansız” olur və əlbəttə ki, ana elləri ilə hazırlanmış plov, dolma, buğlama, düsbərə, gürzə və hətta qutab ilə müqayisə edilə bilməzlər.

Bu arada yalnız atmosferi və mətbəxi gözəl olan kafe və restoranlara təkrar qayıdıram.
Evdən kənarda az yediyim üçün yeməyə dəfələrlə az pul xərcləyirəm və yetərincə sağlam və tamlı yeməklər yeyirəm.

Bugünki bazar qiymətlərindən o qədərdə məlumatlı deyiləm, amma bir neçə il öncə, bir neçə aylıq evin bazarlığını fiziki olaraq üzərimə götürdüyüm zaman bu və ya digər xörəyin bişirilməsinə nə qədər vəsaitin tələb olduğunu müəyyən etdim.

Əsas suala cavab olaraq deməliyəm ki, bir neçə dəfə 100-150 manat yemək üçün hesab ödəmişəm və buna əlbəttə ki, dəyərdi. İlk növbədə kababı və ya balığı evdə hazırlamaq əziyyətli bir işdir, xüsusilə də müvafiq şərait yoxdursa. Kababın ətini doğramaq, basdırmasını hazırlamaq, sonra tüstüsündən boğula-boğula hazırlamaq və ya balığı təmizləmək və sair və ilaxır… Bundansa təmiz və səliqəli bir yerdə ustalıqla bişirilmişini yemək daha yaxşıdır.

Əlbəttə ki, restoran və kafelərdə kosmik qiymətlərlə gündə yeməyə dəyməz çünki, orada yediyiniz istənilən yemək və ya desertlərin qiymətləri mayadeyərindən dəfələrlə yüksəkdir. Ən azından bəzi məkanlarda biznes-lançlar istisna olmaqla əksər hallarda bu belədir.

Misal üçün kafelərdə təklif olunan desertlərin bir tikəsi 5-10 manat arası dəyişir, bu isə evdə bişirilən bir bütöv şirniyyatın (bu şarlotka, çizkeyk və ya tort ola bilər) mayadəyəridir. Bağlaması (400 qr) 5-6 manata olan çayın 7 qramilə hazırlanmış bir çaydan çaya 8-12 manat ödəməyə də dəyməz, hətta bu çay qızil suyuna salınmış çaydanda dəmlənsə belə.
Sözsüz ki, kafedə bu şirniyyatlar və çaylar bəzən gözəl servis edilir və heçdə hər kəs istənilən əl qabiliyyətinə malik deyil ki, beynəlxalq səviyyədə tanınmış desertləri hazırlasın, amma yenə də qiymətin bir əsası olmalıdır.

Buna baxmayaraq bir çoxlarının mətbəxdə uzun zaman keçirməyə nə vaxtı, nə həvəsi var. Belə hallarda yemək xərcləri amansızcasına artır.

İlk baxışdan əlbəttə ki, bu qədər bədxərcliyə yol vermək olmaz, lakin xanımlarımızında istirahət etmək haqqı var.

Belə ki, il boyu hər gün evdə xörək bişirən, ailə üzvlərinin ad günləri və ya bayram münasibəti ilə gözəl süfrələr açan xanımlarımız yorğun olduqları zaman, həftəsonlarında və ad günlərində gözəl bir restoranda yemək yeməlidirlər ki, güc toplasınlar və sevərək ailələrinin qeydinə qalsınlar.