Dünya xəritəsi, şəhər siluetləri, sənədlər və kompaslardan ibarət kollaj

Dünya böyük görüşləri izləyərkən arxa planda qalan 6 mühüm hadisə

19 noyabr 2026-cı il Bakı–İrəvan diplomatik xəttindəki yeni mesajlar və Prezident İlham Əliyevin Vyetnam səfəri, Şençjendə keçirilən qlobal liderlər görüşü ilə yadda qalıb.

Böyük manşetlərin arxasında isə Antalyadakı COP31 müzakirələrindən Silikon Vadisindəki casusluq həbsinə qədər diqqətdən qaçmamalı olan mühüm proseslər baş verib.

Azərbaycan gündəmi

  • Prezident İlham Əliyevin Vyetnama rəsmi səfəri: Dövlət başçısı Vyetnama rəsmi səfərə gedib və Vyetnam Xəbər Agentliyinə geniş müsahibə verərək iki ölkə arasında strateji tərəfdaşlığın yeni mərhələyə keçdiyini bəyan edib.
  • Bakı–İrəvan xəttində paralel mesajlar: Azərbaycan Prezidentinin köməkçisi Hikmət Hacıyev Ermənistanın 200-dən çox kütləvi məzarlığın yerini açıqlamasını gözlədiklərini bildirib. Eyni gündə Ermənistanın baş naziri Nikol Paşinyan konstitusiya dəyişikliyi rədd ediləcəyi təqdirdə istefa verəcəyini açıqlayıb, parlament sədri Alen Simonyanın isə Azərbaycana səfər edəcəyi xəbəri gündəmə düşüb.
  • Təhsil və hüquq-mühafizə sahəsində diqqətçəkən qərarlar: Məleykə Abbaszadənin Bakı Dövlət Universitetinin (BDU) rektoru təyin edilməsi xəbəri sosial mediada geniş müzakirə yaradıb. Hüquq gündəmində isə prokurorun Namizəd Səfərova 8 il cəza istəməsi və vəkil Orxan Kəngərlinin saxlanılması ön plana çıxıb.

Kölgədə qalan  hadisələr

  • COP31-də Azərbaycanın iqlim maliyyəsi mövqeyi: Antalyada keçirilən COP31 platformasında Azərbaycanın iqlim dəyişikliyi ilə mübarizə tədbirlərinin maliyyələşdirilməsinin artırılmasını dəstəkləməsi yüksək səviyyəli səfərlərin kölgəsində qalsa da, ölkənin post-COP29 diplomatik xəttinin davamı baxımından vacib siqnaldır.
  • Türkiyədən ekstradisiya və kriminal statistika: Beynəlxalq axtarışda olan şəxsin Türkiyədə saxlanılaraq Azərbaycana ekstradisiya edilməsi və gün ərzində ölkə üzrə 38 şübhəlinin saxlanılması rəsmi xronikada qısa qeyd kimi keçib.
  • Paytaxt nəqliyyatında dəyişiklik: Bakıda 6 avtobus marşrutunun hərəkət istiqamətinin müvəqqəti dəyişdirilməsi gündəlik sərnişin axınına birbaşa təsir etsə də, siyasi xəbərlərin arxasında qalıb. Yol hərəkəti təhlükəsizliyinin təkmilləşdirilməsi ilə əlaqədar H1, 140, 150, 163, 189 və M8 nömrəli avtobus marşrutlarının hərəkət sxemi müvəqqəti dəyişdirilir:
    20 noyabr (00:00–06:00): Hava limanı şosesindən «Koroğlu» m/st. istiqamətində hərəkət məhdudlaşdırılır.
  • H1: Zığ şosesi – 8 Noyabr pr. – A. Cəlilov – Puşkin küçələri ilə;
    140, 150: Zığ şosesi – Gəncə pr. – Q. Qarayev pr. ilə;
    163, 189, M8: M. İbrahimov, Ə. Məmmədəliyev, A. Əsədullayev, Y. Əliyev və B. Bünyadov küçələri ilə.
    22 noyabr (00:00–05:45): «Koroğlu» m/st.-dan hava limanı istiqamətində hərəkət məhdudlaşdırılır. 140, 150, H1: Bakıxanov qəsəbəsi (E. Mehdiyev, Y. Əliyev, S. Bəhlulzadə, X. Ələkbərov, İ. Nəsimi və Ə. İsaqzadə küçələri) ilə;
    163, 189, M8: Bakıxanov qəsəbəsi (E. Mehdiyev, Y. Əliyev və A. Əsədullayev küçələri) ilə hərəkət edəcək.

Dünya gündəmi

  • Şençjendə APEC sammiti və böyük görüşlər: Çin Xalq Respublikasının Şençjen şəhərində keçirilən APEC sammiti çərçivəsində ABŞ Prezidenti Donald Tramp ilə Çin lideri Si Cinpin arasında görüş başa çatıb, paralel olaraq Tramp–Putin ikitərəfli görüşü dünya mediasının əsas manşetinə çevrilib.
  • Yaxın Şərqdə hərbi gərginlik: İran müharibəsi fonunda Donald Trampın 2027-ci il yanvarın 1-dən sonra proseslərin gedişatına uyğun addım atılacağı barədə açıqlaması, həmçinin Səudiyyə Ərəbistanının paytaxtı Ər-Riyadda Dövlət İnvestisiya Fondunun binasına husilərin raket zərbəsi nəticəsində ziyan dəyməsi qlobal bazarların və diplomatiyanın diqqət mərkəzində olub.
  • Krım körpüsünə növbəti hücum: Rusiya tərəfi Ukraynanın bir həftə ərzində üçüncü dəfə Krım körpüsünə hücum etdiyini açıqlayıb.

Kölgədə qalan hadisələr

  • Silikon Vadisində casusluq həbsi: ABŞ-ın Kaliforniya ştatında, Silikon Vadisində Rusiya vətəndaşının Ukrayna ordusuna dəstək verən müdafiə texnologiyaları şirkəti «Palantir»in əməkdaşlarına qarşı casusluq cəhdi ittihamı ilə saxlanılması texnologiya və təhlükəsizlik dairələri üçün kritik xəbər olsa da, sammit xəbərlərinin kölgəsində qalıb.
  • Zaporojye AES-də hüquqi-bürokratik addımlar: Rusiya tərəfinin işğal altındakı Zaporojye Atom Elektrik Stansiyasının enerji bloklarının lisenziyalaşdırılması prosesini davam etdirməsi və Krımda yeni güzəştli ipoteka proqramı başlatması bölgədə uzunmüddətli demoqrafik və inzibati möhkəmlənmə cəhdi kimi diqqət çəkir.
  • Krım tatarı qadına ağır hökm: İşğal hakimiyyətinin Krım tatarı olan 38 yaşlı Lera Cəmilovanı «dövlətə xəyanət» ittihamı ilə 17 il müddətinə azadlıqdan məhrum edib.
    Həbsin səbəbi Ukrayna Silahlı Qüvvələrinin (VSU) dəstəklənməsi üçün vəsait köçürməkdə təqsirləndirilməsidir.
    Qadın əlavə oladaq 150 min rubl məbləğində cərimə olunub və həbsdən sonra 1 il azadlığının məhdudlaşdırılması qərarı verilib.

Discover more from TIME

Subscribe to get the latest posts sent to your email.

Bir cavab yazın