Reallıq belədir ki, hətta ən pozitiv insanın belə bəzi məqamlarda ağlına neqativ fikirlər gəlir. Ümumiyyətlə, bu tamamilə normaldır, çünki dünya təkcə çəhrayı və bənövşəyi rənglərdən ibarət deyil. Ən möhtəşəm uğurlardan sonra belə, öz çatışmazlıqları, problemləri və qayğıları ilə boz iş günləri başlayır və bunlar çox vaxt neqativ düşüncələrə yol açır. Bəs belə məqamlarda nə etməli?

Aşağıda neqativ düşüncə tərzinə qarşı ən effektiv addımları təqdim edirik:

1. İlk növbədə bir fincan çay, qəhvə və ya bir stəkan su için, dadlı bir təam dadın və ya sadəcə bir az yatıb dincəlin. Görəcəksiniz ki, özünüzü az da olsa daha yaxşı hiss edirsiniz.

2. Daha sonra vəziyyətə kənardan baxın və onu obyektiv şəkildə təhlil etməyə çalışın. Ola bilsin ki, neqativ fikirlərin yaranmasının altında yatan gizli səbəbi məhz bu an tapacaqsınız.

3. Əgər neqativ fikirlərinizin səbəbi konkret bir insandırsa, onu nəyin idarə etdiyini (hansı hisslərlə hərəkət etdiyini) anlamağa çalışın. Müxtəlif amillərin toplanması nəticəsində mürəkkəb bir vəziyyət yaranıbsa, problemin kökünü müəyyənləşdirmək lazımdır. Nəticəyə əsasən, həmin məsələyə fikir verməyə və əhvalınızı korlamağa dəyib-dəymədiyinə qərar verin.

4. Sizi ən çox narahat edən məqamları çətinlik dərəcəsinə görə və onların mümkün həll yollarını kağıza yazın, sonra isə «kiçik addımlar» prinsipi ilə hərəkətə keçin. Problemi ən yüngül və asan tapşırıqlardan başlayaraq həll edin — bəzən bu, sadəcə iş masasını səliqəyə salmaq və ya evi yığışdırmaq da ola bilər.

5. Əgər hazırda neqativ fikirlərin mənbəyindən uzaqlaşmaq və ya onu tamamilə aradan qaldırmaq heç cür mümkün deyilsə, sadəcə bu «yük»lə birgə, ona qapılmadan irəliləməyə davam etmək lazımdır. Çox güman ki, tezliklə problem öz aktuallığını itirəcək və ya neqativ fikirlərin səbəbini yox etmək üçün qarşınızda yeni bir imkan yaranacaq.

Nəyi qətiyyən etmək olmaz?

Siz-siz olun, amma heç bir halda bu neqativ düşüncələri durmadan kiminləsə müzakirə etməyin, çünki bu neqativə köklənib qapanmağın və əsəblərinizi sıradan çıxarmanızın ən doğru yoludur.