Nazirlər Kabineti istehsalatda bədbəxt hadisələr və peşə xəstəlikləri zamanı əmək qabiliyyətinin itirilməsi dərəcəsinin müəyyən edilməsi ilə bağlı yeni qaydanı təsdiqləyib.

İndiyədək bu sahədə vahid meyarlar yox idi, yeni mexanizm isə prosesi tamamilə rəqəmsallaşdırır və daha ədalətli edir.

Əsas yenilik nədir?

Əvvəllər standart yanaşma tətbiq olunurdusa, artıq eyni zədə və ya xəstəliyə görə hamıya eyni faiz yazılmayacaq. Qiymətləndirmə zamanı ədalətliliyi təmin etmək üçün 4 əsas amil nəzərə alınacaq:

• Vətəndaşın yaşı;
• Gördüyü işin (peşəsinin) ağırlıq dərəcəsi;
• Xəstəliyin onun peşəsinə nə dərəcədə mane olması;
• Orqanizmin funksiyalarının pozulma faizi və müddəti.

Nümunə: Eyni əl zədəsini alan bir ofis işçisi ilə fiziki əməklə məşğul olan fəhləyə fərqli kompensasiya faizləri təyin ediləcək, çünki zədənin onların işinə təsiri eyni deyil.

Müraciət və rəsmiləşdirmə necə aparılacaq?

1.Vətəndaş şəxsi kabinet üzərindən elektron müraciət etməlidkr.

İşəgötürən ƏMAS altsistemi, zərərçəkən vətəndaş isə “e-sosial” portalındakı şəxsi kabineti vasitəsilə (Forma 88 göndərişi əsasında) rəqəmsal müraciət edir. Kağız daşıyıcılara ehtiyac qalmır.

2.Təyinat və bildiriş 10 iş günü ərzində hazır olmalıdır

Dövlət Tibbi-Sosial Ekspertiza və Reabilitasiya Agentliyi müraciəti aldıqdan sonra 10 iş günü müddətində yoxlanışın vaxtı və yeri barədə sistem üzərindən vətəndaşa və işəgötürənə rəsmi məlumat göndərir.

3.Komissiya qiymətləndirilməsi işəgötürənin iştirakı ilə həyata keçirilir

Xüsusi ekspert komissiyası işəgötürənin nümayəndəsinin də iştirakı ilə vətəndaşı müayinə edir və əmək qabiliyyətinin itirilməsi dərəcəsini (faizini) təyin edir.

Vətəndaşlar üçün digər mühüm üstünlüklər

• Əlavə xərclərin ödənilməsi: Komissiya təkcə faiz təyin etməyəcək, həmçinin vətəndaşın müalicə, dərman, əlavə qidalanma və reabilitasiya vasitələrinə ehtiyacının olub-olmadığını da müəyyən edəcək (bu xərclərin qarşılanması üçün).
• İki fərqli xəstəlik halı: Əgər vətəndaşda əmək qabiliyyətinin itirilməsinə səbəb olan iki fərqli xəstəlik və ya zədə varsa, yekun qərarda daha yüksək olan faiz əsas götürüləcək.
• Təkrar yoxlanış: Əgər faiz müəyyən müddətə verilibsə və həmin müddət bitdikdən sonra xəstəlik davam edirsə, vətəndaş yenidən pulsuz təkrar qiymətləndirmədən keçəcək.