Əməkdar jurnalist, yazıçı-publisist Bahəddin Həzinin “Göyün cazibə qüvvəsi” kitabının imza günü və təqdimatı baş tutub.

Milli Elmlər Akademiyasının Mərkəzi Elmi Kitabxanasında baş tutan tədbirdə millət vəkilləri, jurnalistlər, yazıçılar və oxucular iştirak edib.

Professor Qulu Məhərrəmli tədbirdə qeyd edib ki, kitab insanın həyata baxışıdır, ruhunun qidasıdır, yaxşı kitab isə böyük bir abidədir

Çıxışlardan sonra Bahəddin Həzi çıxış edərək tədbirdə iştirak edənlərə təşəkkürlərini çatdırıb və bildirib ki, bu kitabda son üç ildə yazdığı bədii esselər toplanıb.

“Mən istəyirəm ki, siz kitabla mənim sözlərim vasitəsilə tanış olmayasınız, özünüz oxuyaraq tanış olasınız. Biz həyatımızı iki kitab arasında yaşayırıq, Əlifba və Quran. Bu iki kitab arasında biz müxtəlif kitablar oxuyuruq. Mən ümid edirəm ki, mənim bu kitabım sizin həyatınızda Əlifba və Quran kitabları arasına girə biləcək”, – deyə o fikirlərini yekunlaşdırıb.

Qeyd edək ki, kitabda yazıçı-publisist, əməkdar jurnalist Bahəddin Həzinin son illərdə qələmə aldığı esselər toplanıb. “Ştaynhof klinikasının küskün pasiyentləri”, “Qlamur cahilin anatomiyası”, “Fotogenom”, “Slavyan gözəlinin diktaturası”, “Tənhaların Planeti”, “Uğur mələyi, incə sənət əsəri”, “Yüz ilin kişisi”, “Göyün cazibə qüvvəsi”, “Yazıq xoşbəxt”, “Bədbəxtlik indeksi və ya göz yaşı içində gülüş”, “Kənar şəxslərin girişi qadağandır”, “Dünyanın bu üzündə” və başqa esselərdə Yaradan, dünya, müharibə, sülh, həyat, ölüm, sevgi, qorxu, nifrət, elm, zaman və İnsanın özü haqqında fəlsəfi fikirlər, psixoloji araşdırmaların nəticələri öz əksini tapıb. Ümid edirik ki, “Göyün cazibə qüvvəsi” də müəllifin bundan əvvəl çap olunmuş “Ölümcül həqiqətlər” kitabı kimi oxucu marağına səbəb olacaq.