Tez yatıb daha uzun zaman yatan yeniyetmələr daha yüksək zehni qabiliyyətlər nümayiş etdirir və koqnitiv testlərdə yaxşı nəticə göstərirlər.

Kembric və Fudan universitetlərinin alimləri 3222 nəfərin iştirakı ilə araşdırma apardıqdan sonra bu qənaətə gəliblər

Araşdırma iştirakçılarının smart saatlar və Fitbit qolbaqları vasitəsilə yuxuları izlənilib, onlar beyin skanından və koqnitiv testlərdən keçiblər.

Nəticədə yeniyetmələr üç qrupa bölünüb. Birinci qrup iştirakçıların təxminən 39%-ni əhatə edib – onlar hamıdan gec yatıb və hamıdan tez oyanıblar, orta hesabla yuxuya 7 saat 10 dəqiqə vaxt ayırıblar. İkinci qrup, iştirakçıların təxminən 24%, 7 saat 21 dəqiqə yatıb. Üçüncü qrup isə iştirakçıların 37%-ni təşkil edib, onlar hamıdan tez yataraq daha uzun zaman yatıblar, buna təxminən 7 saat 25 dəqiqə sərf ediblər. Onlarda yuxu zamanı ən aşağı ürək döyüntüləri qeydə alınıb.

Yeniyetmələrin təhsil səviyyəsində əhəmiyyətli fərqlər olmayıb, lakin üçüncü qrupda olan yeniyetmələr koqnitiv testlərdə ən yüksək bal toplayıblar. Birinci qrup isə ən pis nəticə göstərib.

Nəticədə alimlər belə qərara gəlublər ki, idrak qabiliyyətini stimullaşdıran yuxudur, çünki gecə istirahəti zamanı xatirələrin möhkəmlənməsi baş verir.

Alimləri ən çox təəccübləndirən amil, yuxu rejimində fərqlərin zehni qabiliyyətlərə böyük təsir göstərməsi olub. Onlar bunun yuxu borcunun yığılması ilə və nəticədə gecə istirahətinin miqdarının az olması ilə əlaqələndirirlər.