Azərbaycanda televiziya kanallarının maliyyə dəstəyinə ehtiyacı var. Televiziyada eşitmə məhdudiyyətləri olan insanlar üçün və uşaqlar üçün yeni kontent hazırlanacaq.

Bunu bu gün jurnaanlistlər üçün keçirilən brifinqdə Audiovizual Şuranın sədri İsmət Səttarov deyib.

O qeyd edib ki, televiziya sahəsinin gəlirləri hər il azalmağa doğru gedir. “Azərbaycan televiziyalarının maliyyə dəstəyinə ehtiyacı var. Onların gəlirləri artmır. Lakin bununla bağlı təkliflərimizi hazırlayırıq”, – deyə o qeyd edib.

Özəl kanallara bu il üçün maliyyə dəstəyin verilməsi məsələsinə də münasibət bildirən İ. Səttarov qeyd edib: “Dünyada televiziya sahəsinin gəlirləri ildən-ilə azalır. Bu, digital medianın inkişaf etməsi ilə reklam platformalarının sayının çoxalması ilə bağlıdır. Belə bir halda televiziyanın kommersiya gəlirləri artmır. Ölkəmizdə iqtisadi inkişaf nəticəsində əməkhaqları artır. Televiziyanın da biznes subyekti kimi xərcləri gündən-günə çoxalır. Azərbaycanda televiziyaya dəstəyin müxtəlif formaları mövcuddur”.

Sədr onuda qeyd edib ki, bu ildən dövlət tərəfindən maaliyələşən kanallarda surdotərcüməçiliyin tətbiq edilməsi üçün qanuna dəyişiklik edilməsi üzrə işlər gedir.

O bildirib ki, Milli Məclisdə bu qanun müzakirə edildikdən sonra qərar veriləcək.

“Azərbaycanda surdotərcümə çox azdır. Gələcəkdə özəl kanallarda da surdotərcüməçiliyin tətbiq edilməsi ola bilər”, – deyə o qeyd edib.

Milli televiziyamızın problemlərindən bəhs edərək İ. Səttarova qeyd edib ki, yerli istehsal cizgi filmləri yox səviyyəsindədir.

O bildirib ki, bizim yerli cizgi filmləri çəkilmir.

“Biz istəyirik ki, yeni kontent olsun. Uşaqlarımız üçün yeni cizgi filmlər çəkilsin. Lakin bunlar televiziyaların işi deyil. Bu, prodakşnların işidir”, – deyə sədr qeyd edib.