Ötən gün nəhayət vaxt tapıb “Tağıyev:Neft” filminə baxmaq üçün kinoteatra getdim.

Azərbaycanda bir çox neft milyonçusu olub, lakin Zeynalabdin Tağıyev eyni zamanda o dövrdə ölkəmizin, gənclərimizin, xüsusəndə gənc qızların inkişafı üçün önəmli sosial layihələr gerçəkləşdirib.

Eyni zamanda, bugün də şəhərimizin qonaqlarını heyrətləndirən arxitektur abidələrin binövrəsini qoyub. Çox maraqlı və ibrətamiz həyat yoluna malik olan şəxsiyyətlərdən biridir. Məhz buna görədə, ölkəmizdə belə bir tarixi filmin çəkildiyi həm sevindirdi, həmdə maraq doğurdu.

Filmə gəldikdə, deməliyəm ki, keyfiyyətinə söz ola bilməz, aktyor seçimi mükəmməldir. Gətiyən sünilik yoxdur, çox gözəl şəkildə “bakılı ruhu”, xarakter çeşidi təsvir edilib, hətta uşaqlar belə rolu oynamırdılar, yaşayırdılar. 

“Dinməz-danışmaz, bir kəlmə ilə hər şeyi anlatar” təsvirinə cavab verən yeganə qadın obrazı bir neçə kadrla öz sözünü dedi.

Çox heyfsləndim ki, övladlarımla getmədim, çünki gənclərə önəmli mesaj verən kadrlar var. Eyni zamanda, gənclərin belə bir insanların həyat yolu, uğuradək çəkdikləri əziyyətlər haqda məlumatlı olması vacibdir.

Nefti gözləmə müddəti biraz uzun oldu, amma insanların dar gündə nümayiş edə biləcəkləri əks tərəfləri göstərildiyi üçün, səmərəli oldu.

Filmin sonunda növbəti bölümlərin anonsu maraq doğurdu, səbirsizliklə davamını gözləyəcəyəm.

Aynur Vəliyeva