2026-cı il Ramazan ayı üçün fitrə zəkatı ilə bağlı rəsmi məlumatlar artıq açıqlanıb.

Qafqaz Müsəlmanları İdarəsinin (QMİ) fətvasına əsasən bu il fitrə zəkatının məbləği adambaşına 10-15 manat arasında tövsiyə olunur. Bu məbləğ şəriətə uyğun olaraq 3 kiloqram buğda, arpa, xurma və ya düyünün orta bazar qiyməti əsasında müəyyən edilib.

Maddi imkanı daha geniş olan ailələrin daha üstün məhsulların (məsələn, xurma və ya düyü) qiymətinə uyğun olaraq daha yüksək məbləğdə fitrə verməsi bəyənilir. İmkanı zəif olanlar üçün isə minimum hədd (təxminən 3-5 manat – 3 kq buğda dəyəri) əsas götürülə bilər.

Fitrə zəkatı nə vaxt verilməlidir?

Fitrə zəkatının vaxtı Ramazan ayının son günü – bayram axşamı (iftardan sonra) daxil olur. Buna görədə itrə zəkatı Bayram namazına qədər çıxarılmalı və ehtiyacı olanlara çatdırılmalıdır. Bayram namazına qədər verilməsinin əsas hikməti odur ki, ehtiyacı olan ailələr də həmin vəsaitlə bayram süfrəsi aça bilsinlər.

Kimlər fitrə zəkatı verməlidir?

Ailə başçısı həm özü, həm də himayəsində olan hər bir şəxs (uşaqlar da daxil olmaqla) üçün fitrə çıxarmalıdır. Zəkat ilk növbədə yaxın ətrafda olan ehtiyaclı qohumlara, qonşulara və kimsəsizlərə verilməlidir. Bu il Ramazan bayramının (Fitr bayramı) ayın görünməsindən asılı olaraq 20 mart tarixinə təsadüf edəcəyi gözlənilir.

Bayram namazlarının vaxtı Bakıda 20 mart saat 08.30-09.30 radələrində olacaq. Bakı şəhərində əsas bayram namazları Heydər Məscidi, Təzəpir Məscidi və Əjdərbəy məscidində qılınır. Bölgələrdə isə namaz yerli məscidlərin müəyyən etdiyi saatlarda (adətən günəş çıxdıqdan 45-60 dəqiqə sonra) icra olunur.

Əgər namaza gedəcəksinizsə, fitrəni namazdan əvvəl ayırmaq və ya imkan varsa çatdırmaq lazımdır. Namazdan sonraya qalan fitrə adi sədaka hökmündə sayılır.