Yulaf üzərində qurulan iki günlük pəhriz “pis” xolesterolun səviyyəsini 10% azalda bilər. Bunun üçün gündə üç dəfə 100 qram sıyıq yemək və rasionu meyvə-tərəvəzlərlə tamamlamaq lazımdır.

Bonn Universitetinin alimləri tərəfindən aparılan araşdırmada metabolik sindromdan (artıq çəki, yüksək təzyiq və şəkər səviyyəsi ilə xarakterizə olunan vəziyyət) əziyyət çəkən 68 nəfər iştirak edib. Sınaq iştirakçıları üç qrupa bölünüb. İki gün ərzində birinci eksperimental qrupun üzvləri gündə üç dəfə suda bişirilmiş 100 qram yulaf yarması (gün ərzində cəmi 300 q) qəbul ediblər. Sıyığa meyvə və tərəvəz əlavə etməyə icazə verilib. Vacib tələb isə yağlı, xəmir xörəkləri və şirniyyatları ehtiva edən “qərb pəhrizindən” imtina etmək və rasionun ümumi kalorisini 2 dəfə azaltmaq olub. İkinci (nəzarət) qrupu da aşağı kalorili pəhriz saxlasa da, yulaf qəbul etməyib. Üçüncü qrupun iştirakçıları isə yarım il ərzində gündə 80 qram yulaf yeyib, lakin eyni zamanda qidalanmada heç bir məhdudiyyət qoymayıblar: karbohidratlı və yüksək kalorili qidalar qəbul ediblər.

Nəticələr göstərib ki, ən çox faydanı qidalanmada məhdudiyyətlərə əməl edən və 300 qram sıyıq yeyən könüllülər əldə edib. LDL (aşağı sıxlıqlı lipoprotein) xolesterolunun 10% azalması ilə yanaşı, iştirakçılar orta hesabla iki kiloqram çəki itiriblər və arterial təzyiqin bir qədər düşdüyünü qeyd ediblər. Ən əsası odur ki, müsbət dəyişikliklər eksperimentdən altı həftə keçdikdən sonra belə qismən qorunub saxlanılıb. İkinci qrupdakı insanlar da çəki atıblar, lakin onlarda xolesterolun xüsusi bir azalması qeydə alınmayıb.

Üçüncü qrupdakı iştirakçılar üzərində aparılan təcrübə isə görünən bir nəticə verməyib. Belə çıxır ki, qeyri-balanslı qidalanma fonunda az miqdarda sıyıq yemək lipid profilini yaxşılaşdırmır.

Alimlərin fikrincə, yulafın müsbət təsir mexanizmi bağırsaq mikrobiomunun tərkibinin dəyişməsi ilə bağlıdır. Analizlər göstərib ki, yulaf pəhrizi müəyyən növ faydalı bağırsaq bakteriyalarının artmasına kömək edib. Bu bakteriyalar yulafı parçalayarkən xolesterol metabolizmasına müsbət təsir göstərən xüsusi fenol birləşmələri istehsal edirlər. Eyni zamanda, pəhriz histidin aminturşusunun emalında iştirak edən mikroorqanizmlərin aktivliyini azaldıb ki, bu da potensial olaraq tip 2 diabetdən əvvəl yaranan insulin müqaviməti riskini aşağı sala bilər.

Alimlər ehtiyatlı bir nəticə çıxarırlar: dövri olaraq qısamüddətli intensiv yulaf pəhrizinə əməl etmək (məsələn, ay yarımda bir dəfə) xolesterol səviyyəsinə nəzarət və ürək-damar xəstəliklərinin profilaktikası üçün effektiv strategiya ola bilər. Lakin qəti tövsiyələr üçün daha böyük seçmə qrupu ilə aparılan və bu təcrübənin uzunmüddətli təsirlərini öyrənən əlavə araşdırmalara ehtiyac var.