İki faktorlu autentifikasiya (2FA) və bərpa kodları istifadəçinin hər hansı rəqəmsal platformada mövcud olan hesabına daxil olarkən əlavə təhlükəsizlik tədbiri olaraq tətbiq olunan bir doğrulama üsullarıdırlar.

2FA istifadəçinin yalnız parolu ilə deyil, əlavə bir doğrulama faktoru ilə də tanınmasını tələb edir. Bu, hesabların təhlükəsizliyini artırır və icazəsiz girişlərin qarşısını almağa kömək edir.

İki faktorlu autentifikasiyanı necə aktivləşdirə bilərəm?

Bunun üçün cihazınızda mövcud olan istənilən autentifikasiya proqramlarından birini istifadə etmək mümkündür. Əgər cihazınızda mövcud proqram yoxdursa, “Google Authenticator” və ya “Microsoft Authenticator” yükləyə bilərsiniz. Daha sonra “mygov ID” hesabına İdentifikasiya nömrəsi ilə (FİN kod) daxil olub, şəxsi kabinetə keçid edir, “Təhlükəsizlik” bölməsini klikləyir və “İki faktorlu autentifikasiya” altbölməsini seçirsiniz. Cihazınıza yüklədiyiniz tətbiq vasitəsilə veb-səhifədəki QR kodu oxudursunuz. Bununla da vətəndaşın “mygov ID” hesabında ikifaktorlu təsdiqləmə aktivləşir.

Bərpa kodları nədir?

Bərpa kodları cihazınız yanınızda olmadıqda və ya iki faktorlu autentifikasiya kodlarını əldə edə bilmədiyiniz təqdirdə hesabınıza daxil olmaq üçün istifadə edilə bilər. İki faktorlu autentifikasiyanı aktivləşdirmədən öncə mütləq bərpa kodlarını kopyalayın və yaddaşda saxlayın, çünki, cihazınızı itirdiyiniz təqdirdə bərpa kodlarınız olmasa sistemə daxil ola bilməyəcəksiniz.

Giriş açarı nədir?

Giriş açarı (passkey), hesabınıza daxil olmaq üçün parollara ehtiyac duymadan daha təhlükəsiz, asan, sürətli giriş üsuludur və fişinq hücumlarına qarşı dayanıqlıdır.
Bu sistem barmaq izi, üz tanıma və ya cihazınızdakı xüsusi bir açarla işləyir. Siz sadəcə öz cihazınızı istifadə edirsiniz, əlavə parol yadda saxlamağa ehtiyac qalmır.
Qeyd edək ki, hər bir cihaza aid maximum 1 giriş açarı yarada bilərsiniz, o giriş açarını dəstəkləyən bütün cihazlarda işləyir. Cihazınızda bu funksinallığın açıq aktiv olduğundan əmin olun.

Giriş açarını necə yarada bilərsiniz?

Bu təhlükəsizlik tədbirini dəstəkləyən istənilən platformada şəxsi kabinetinizin “təhlükəsizlik” bölməsindən “giriş açarı” alt bölməsini seçin. “Yeni” düyməsinə kliklədikdən sonra , açarınızın adını daxil edib “əlavə et” düyməsinə klikləyin. Əməliyyatı icra etdiyiniz cihazdan asılı olaraq sistem sizə avtomatik müvafiq giriş açarını təqdim edəcək. Cihazınızın təlimatlarına uyğun olaraq addımları izləyin və giriş açarınızı yaradın.