Hazırda dezinformasiya qarşıda duran risklər arasında ikinci yerdə göstərilir. Əslində, dezinformasiyaların yaranması münaqişələr və savaşlarla sıx bağlıdır, çünki münaqişələrin içində yalan informasiyalar və ictimai rəyin manipulyasiyası da olur.

“Mediada İnnovativ Təşəbbüslərə Dəstək” İctimai Birliyinin sədri, media eksperti Müşfiq Ələsgərli bunu “Dezinformasiya: qlobal miqyasda və Azərbaycan reallığında ən ciddi təhlükə kimi” mövzusunda keçirilən ictimai müzakirə zamanı deyib.

O bildirib ki, son 10 ildə dezinformasiyanın dünya üçün ciddi riskə çevrilməsi sürətlə artıb. “Bunun iki əsas səbəbi var. Birincisi, dünyada siyasi aktivliyin və münaqişələrin sayının artmasıdır. Dezinformasiya artıq müharibələrin və hibrid müharibələrin əsas aləti, informasiya savaşının əsas komponentidir. Bu, insanların yanlış məlumatla çaşdırılması və ictimai rəyin manipulyasiyasını təmin edir. Münaqişələr qızışdıqca və rəqabət artdıqca dezinformasiyanın yayılması da daha sürətli olur.

İkinci səbəb isə dezinformasiyanın qarşısının alınmasında gecikmələrdir. Rəqəmsal texnologiyaların sürətlə inkişafı və yeni media alətlərinin artması dezinformasiyanın çox sürətlə yayılmasına imkan yaradır. Bu səbəbdən, hazırda dezinformasiya həm sürətlə yayılan, həm də effektiv qarşısı alınması çətin olan bir fenomendir”, – deyə ekspert əlavə edib.

Medianın İnkişafı Agentliyinin icraçı direktorunun müavini Natiq Məmmədli isə tədbirdə çıxış edərək, Azərbaycanda dezinformasiya ilə mübarizə sahəsində həm parlament komitələri, həm də müxtəlif dövlət qurumları çərçivəsində müvafiq mexanizmlərin artıq formalaşdığını bildirib.

Bu mexanizmlərin daha da təkmilləşdirilməsi istiqamətində işlər davam etdirilir və sosial barışın qorunması dövlətin əsas prioritetlərindən biri olaraq qalır.

O qeyd edib ki, Şuşa Qlobal Media forumları artıq bir ənənə və beynəlxalq trend kimi formalaşıb. Prezident İlham Əliyev forumların hər birində iştirak edir və dünyanın müxtəlif ölkələrindən gələn jurnalistlərin və media ekspertlərinin suallarını cavablandırır.