Elm və Təhsil Nazirliyinin İnformasiya Texnologiyaları İnstitutu Azərbaycan Tibb Universitetinin I cərrahi xəstəliklər kafedrası ilə birgə hazırlanan “Cərrahi Platforma” tədris portalının təkmilləşdirilməsi işlərini həyata keçirir. Portal distant tədris texnologiyaları sahəsində real innovativ layihə kimi qiymətləndirilir. Gələcəkdə platformanın Azərbaycan Tibb Universitetinin digər kafedralarında, eləcə də bir sıra xarici ölkələrdə istifadəsinin təmin edilməsi nəzərdə tutulur.

AƏRTAC-ın verdiyi məlamata əsasən, İnformasiya Texnologiyaları İnstitutunun baş mütəxəssisi Aqşin Paşayev bildirib ki, “Cərrahi Platforma” layihəsi institutla Azərbaycan Tibb Universiteti arasında həyata keçirilən elmi-innovativ əməkdaşlıq çərçivəsində hazırlanıb.

A.Paşayevin sözlərinə görə, layihənin əsas məqsədi tələbə, rezident və həkimlərin orqan xəstəlikləri, onların müayinəsi, diferensial diaqnostikası, konservativ müalicə üsulları və cərrahi əməliyyatlar haqqında zəruri biliklər qazanmasını təmin etməkdir.

Portalın strukturu və funksional imkanları barədə danışan baş mütəxəssis qeyd edib ki, burada xəstəliklərin diaqnozunun dəqiqləşdirilməsi, düzgün müayinə və müalicə taktikalarının seçilməsi ilə bağlı məlumatlar sual-cavab və slaydlar formatında təqdim olunur. İstifadəçilər professor-müəllim heyətinin praktiki təcrübəsinə əsaslanan məlumatlarla yanaşı, mühazirə materialları və mətnlərlə də tanış olmaq imkanına malikdirlər.

“Cərrahi Platforma” çoxdilli interfeysə malikdir və müxtəlif ölkələrdə təhsil alan və fəaliyyət göstərən tələbələr, rezidentlər, həkimlər, eləcə də xəstələr tərəfindən rahatlıqla istifadə oluna bilər.

A.Paşayev portalın funksional imkanlarının genişləndirilməsi istiqamətində mərhələli şəkildə işlərin aparıldığını, əlavə modullar və yeni funksionallıqların tətbiq edildiyini də vurğulayıb.