Valideynlər artıq mygov platforması üzərindən 18 yaşdan kiçik övladlarının laborator analiz nəticələrini rəqəmsal formada əldə edə biləcəklər.

Platformanın sosial şəbəkə paylaşımlarında qeyd edilib ki, bu inteqrasiya İRİA, İcbari Tibbi Sığorta üzrə Dövlət Agentliyi və TƏBİB-in əməkdaşlığı ilə həyata keçirilib və valideynlərə övladlarına aid analiz tarixi, tibb müəssisəsinin adı, nümunə nömrəsi kimi məlumatlara baxmaq, həmçinin nəticələri PDF formatında yükləmək imkanı yaradır.

Qeyd edək ki, xidmət yalnız şəxsiyyət vəsiqəsi olan övladların analiz nəticələrini əhatə edir və məlumatlar həm veb platformada, həm də mobil tətbiqdə əlçatandır.

• Məlumatı əldə etmək üçün:
• “Xidmətlər” bölməsinə keçin;
• “Ailə” və ya “Sağlamlıq” kateqoriyasını seçin;
• “Övladlarımın laborator analiz nəticələri” xidmətinə daxil olun.

Xatırladaq ki, artıq mygov vasitəsilə övladlarınıza aid şəxsiyyət vəsiqəsi, pasport, doğum haqqında şəhadətnamə və peyvənd məlumatlarını da rəqəmsal formada əldə edə bilərsiniz.