Xidmətlər üzrə ödənişlər 2026-cı il yanvarın 13-dən etibarən qüvvəyə minir.

Şirkət ödənişlərin “Azercell Telekom” MMC tərəfindən təqdim olunan xidmətlərin keyfiyyətinin daha da yüksəldilməsi, müştərilərə təklif olunan xidmət və tariflərin optimallaşdırılması məqsədi ilə tədbiq edildiyini bildirib.

Beləliklə, yanvarın 13-dən etibarən əldə edilən 1 AZN Simkredit üçün 0,30 AZN, 2 AZN Simkredit üçün 0,60 AZN, 2 AZN Simtaksit üçün 0,60 AZN, 3 AZN Simkredit üçün isə 0,90 AZN xidmət haqqı tətbiq ediləcək. Eyni zamanda, “Simkredit”, “Simtaksit”, “Ekstra kredit” və “İnternet kredit” xidmətləri çərçivəsində göndərilən hər sorğuya 0,12 AZN haqq tətbiq ediləcək.

Şirkətin rəsmi məlumatında qeyd edilib ki, abunəçilər göstərilən dəyişikliklər, tarif və internet paketlərinin şərtləri, sifarişi, başqası ilə əvəzetmə və imtina qaydası barədə, o cümlədən “Azercell Telekom” MMC tərəfindən təqdim edilən xidmətlər, tariflər və keçirilən kampaniyalar barədə ətraflı məlumatları rəsmi internet səhifəmizdən (www.azercell.com), həmçinin Müştəri Xidmətlərinə (MX ofisləri, həftənin 7 günü 24 saat ərzində fəaliyyət göstərən Telefon Mərkəzi) müraciət etməklə əldə etmək imkanına malikdirlər.

Qeyd edək ki, yerli mətbuatın verdiyi məlumatlara əsasən yeni ildən şirkət bir sıra xidmətin göstərilməsini dayandıracaq.