Noyabrın 28-də Bakıda Türk Dövlətləri Təşkilatının (TDT) media və informasiya üzrə məsul nazirlərinin və yüksək vəzifəli rəsmilərinin 7-ci toplantısı keçirilib.

Toplantının əsas hədəfi Türk dünyasında informasiya təhlükəsizliyini gücləndirmək, dezinformasiyaya qarşı birgə mübarizəni təşkil etmək və vahid Türk informasiya məkanını formalaşdırmaq olub.

Tədbirin əsas spokerləri aşağidakılar olub:

• Ömer Kocaman – TDT Baş katibinin müavini
• Əhməd İsmayılov – Azərbaycan Medianın İnkişafı Agentliyinin (MEDİA) İcraçı direktoru
• Kanat İskakov – Qazaxıstanın Mədəniyyət və İnformasiya nazirinin müavini
• Digər üzv və müşahidəçi ölkələrin (Türkiyə, Qırğızıstan, Özbəkistan, Şimali Kipr Türk Respublikası) yüksək vəzifəli rəsmiləri.

Ömer Kocaman tədbirdə çıxış edərkən əməkdaşlığın institusional çərçivəsinə diqqət yetirib. O, media sahəsində əməkdaşlığın artıq sistemli və institusional çərçivədə inkişaf etdiyini qeyd edib.

Çıxışda, uzv dövlətlərin media qurumları arasında məzmun mübadiləsinin genişləndirilməsi, strateji kommunikasiyada koordinasiyanın gücləndirilməsi və dezinformasiyaya qarşı çevik müdafiə mexanizmlərinin formalaşdırılması əsas prioritetlər kimi vurğulanıb.

Ö. Kocaman, gələcəkdə informasiya təhlükəsizliyi və strateji kommunikasiya istiqamətlərində yeni təşəbbüslərin və birgə layihələrin icrasının nəzərdə tutulduğunu bildirib.

Öz növbəsində Əhməd İsmayılov, TDT-də media əməkdaşlığının ortaq tarix, mədəni və dil birliyi ətrafında birləşən strateji platforma olduğunu vurğulayıb.

MEDİA rəsmisi, informasiya mübadiləsinin genişləndirilməsi, saxta xəbərlər və hibrid təhdidlərə qarşı birgə mübarizənin əməkdaşlığın əsas hədəfləri olduğunu bildirib.

Ə. İsmayılov, ümumtürk informasiya məkanının daha dayanıqlı və koordinasiyalı şəkildə qurulmasının vacibliyini qeyd edib.

O, həmçinin, Azərbaycan tərəfinin media savadlılığının artırılması və strateji kommunikasiya üzrə birgə təşəbbüsləri davam etdirməkdə maraqlı olduğunu diqqətə çatdırıb.

Kanat İskakov tədbirdə çıxışı zamanı, türk dünyasının ortaq irsə sahib olduğunu bildirərək, müştərək kontent və layihələr həyata keçirdiklərini vurğulayıb. Daha sonra o, üzv dövlətlərin televiziyalarının bir-birinin ərazisində yayımlanması təklifini irəli sürüb.

Toplantı Kommunikenin (Yekun Bəyannamə) qəbulu ilə yekunlaşıb. Sənəddə əsas əməkdaşlıq sahələri, o cümlədən etibarlı və dayanıqlı informasiya yanaşmasının formalaşdırılması, informasiya təhlükəsizliyinin gücləndirilməsi və birgə media tədbirlərinin təşkili məsələləri öz əksini tapıb.

Sonda, 8-ci Nazirlər Toplantısının və İşçi Qrupunun 13-cü iclasının növbəti dəfə Qazaxıstanda keçirilməsi qərara alınıb