Bakıda, 19-20 noyabr 2025-ci il tarixlərində, 9-cu Beynəlxalq Bankçılıq Forumu (IX International Banking Forum – IBF 2025) Bakıda keçirilib.

Artıq ənənəyə çevrilmiş tədbir bu il “Etibarlı, Təhlükəsiz və Dayanıqlı Bankçılıq” devizi altında baş tutub.

Forum çərçivəsində əsasən dünya trendləri olan nağdsız iqtisadiyyat, rəqəmsal transformasiya, süni intellekt, kibertəhlükəsizlik, açıq bankçılıq, kapital bazarları və yeni ödəniş ekosistemləri kimi mövzular müzakirə olunub.

Forumun əsas diqqəti etibarlı, təhlükəsiz və dayanıqlı bankçılığın inkişafına yönəlmişdi. Tədbirdə səsləndirilən əsas fikirlər Azərbaycanın bank sisteminin rəqəmsal gələcəyə doğru atdığı addımları və üzləşdiyi çağırışları əks etdirirdi.

Kibertəhlükəsizlik və dayanıqlılıq haqqında bəhs edərkən Mərkəzi Bankın rəsmiləri çıxışlarında rəqəmsallaşmanın sürəti ilə yanaşı gələn risklərə diqqət çəkərək qeyd etdilər:

“Bank sektorunun rəqəmsal inkişafı sürətləndikcə, kibertəhlükəsizlik risklərinin idarə edilməsi və maliyyə ekosisteminin etibarlılığı əsas prioritet olaraq qalır. Bu, sektorumuzun uzunmüddətli dayanıqlılığının təməlidir. Bizim əsas vəzifəmiz, innovativ xidmətləri təşviq etməklə yanaşı, istehlakçıların məlumatlarının və vəsaitlərinin maksimum qorunmasını təmin etməkdir.”

Azərbaycan Banklar Assosiasiyasının (ABA) rəhbəri Zakir Nuriyev bildirib ki, əsas hədəflər innovasiyanın stimullaşdırılmasına fokuslanaraq rəqəmsallaşma və açıq bankçılığa əsaslanan ekosistem yaratmaqdır.

“Bizim əsas hədəfimiz, ‘Nağdsız İqtisadiyyat’a keçidi dəstəkləyən, Açıq Bankçılıq prinsiplərinə əsaslanan və müştərilərə innovativ rəqəmsal həllər təklif edən bir ekosistem qurmaqdır. AZQR və Ani Ödənişlər sisteminin genişləndirilməsi bu istiqamətdə atılan mühüm addımlardır. Biz bu yeniliklərlə rəqəmsal maliyyə xidmətlərinə çıxışı daha da asanlaşdırırıq.”

Öz növbələrində Mastercard kimi beynəlxalq tərəfdaşlar qlobal trend olan süni intellektin bankçılığa təsirini vurğuladılar:

“Süni intellekt bank əməliyyatlarında yeni bir mərhələ açır. O, yalnız fırıldaqçılığın qarşısını almaq üçün deyil, həm də fərdi müştəri təcrübəsi yaratmaq və xidmətlərin səmərəliliyini köklü şəkildə artırmaq üçün əsas alətdir. Gələcək bankçılıq, Sİ agentlərinin köməyi ilə datalara əsaslanan ‘ağıllı’ qərarların verildiyi bir sahə olacaq.”

“Mastercard”ın Türkiyə, Azərbaycan, Ukrayna və Moldova üzrə Məsləhət və Konsaltinq Xidmətləri klaster rəhbəri Eren Özkan bildirib ki, banklarda müstəri xidmətləri süni zəka ilə göstəriləcək.

İqtisadi İslahatların Təhlili və Kommunikasiya Mərkəzi (İİTKM) icraçı direktoru Vüsal Qasımlı çıxışında bildirib ki, Azərbaycanda iqtisadi artımın sürətləndirilməsi üçün böyük potensial mövcuddur. O, çıxışında bank sektorunun makroiqtisadi rolu və regional inkişaf mövzusuna toxunub:

“Bank sektorunun dəstəyi ilə Böyük Qayıdış proqramının iqtisadi potensialının reallaşdırılması, o cümlədən işğaldan azad edilmiş ərazilərdə sahibkarlığın və maliyyə xidmətlərinin inkişafı üçün yeni investisiya imkanları açılır. Bu, bankların yalnız rəqəmsal deyil, həm də sosial-iqtisadi inkişafda mühüm rol oynadığını göstərir.”

Tədbir Azərbaycan Banklar Assosiasiyası (ABA) tərəfindən, Mastercard beynəlxalq kart təşkilatı ilə tərəfdaşlıqda, Azərbaycan Respublikasının Mərkəzi Bankı və İqtisadi İslahatların Təhlili və Kommunikasiya Mərkəzinin dəstəyi ilə təşkil edilib.

Forumda dövlət qurumlarının, bank və maliyyə institutlarının, fintex ekosisteminin, beynəlxalq təşkilatların və aparıcı şirkətlərin nümayəndələri iştirak ediblər.