Mədəniyyət Nazirliyi tərəfindən tarixi filmlərin çəkilməsi prioritet sahə kimi müəyyən olunub və bu istiqamətdə kinostudiyada xüsusi pavilyonların yaradılması nəzərdə tutulur.

Trend-in verdiyi məlumata əsasən, bunu mədəniyyət nazirinin müavini Fərid Cəfərov Milli Məclisin Gənclər və idman, İctimai birliklər və dini qurumlar, Mədəniyyət komitələrinin birgə iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı deyib.

“Bu məqsədlə Türkiyənin təcrübəsi araşdırılması üçün bir neçə gün əvvəl Azərbaycan Respublikasının Kino Agentıiyinin rəhbərliyi tərəfindən bu ölkədəki tarixi filmlərin çəkildiyi bir sıra povilyonlar şəxsən əyani şəkildə ziyarət olunub”, – deyə F.Cəfərov vurğulayıb.

İclasda bildirilib ki, 2025-ci ildə Azərbaycan Kino Agentliyinə 8,5 milyon manat vəsait ayrılıb.

Maliyyə nazirinin müavini Himalay Məmişov iclasda çıxış edərkən qeyd edib ki,2025-ci ilin artıq 11-ci ayıdır, indiyədək həmin vəsaitin 41 %-Kini i, yəni 3,5 milyon manatı istifadə olunub.

“Hələ 5 milyon manat istifadə olunmamış qalıq var. 2025-ci ilin əvvəlinə həmin qurumun 11,5 milyon manat istifadə olunmamış vəsaiti var. 2026-cı il üçün sifarişlər 12 milyon manatdır. Həmin qurumun əlində olan vəsaitlərin növbəti il üçün xərclərini ödəyəcəyini düşünürük”, – deyə o vurğulayıb.

Nazir müavini həmçinin xatırladıb ki, film istehsalı və dublyaj gəlirləri 90 % mənfəət vergisindən azaddır. Kino sahəsində torpaq və əmlak vergisi cari ildən etibarən 5 il müddətinə tətbiq olunmur. Müəllif hüquqları üzrə ödənilən royalti vergisinə güzəşt tətbiq olunur. Film nümayişi üçün “kəşbək” mexanizmi də mövcuddur.