“İyirmi səkkiz il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaqdır. Bu tarix əbədi yaşayacaq. Bu, bizim şanlı Qələbəmizin, zəfərimizin günüdür!”, – bu sözləri Azərbaycan Prezidenti İlham Əliyev 8 noyabr 2020-ci ildə xalqa müraciətində deyib.

Bu xəbəri oxumaqda, paylaşmaqda qürurverici idi… Artıq biz dərdli-dərdli kəlamlarla torpaqlarımızın neçənci ildir ki, işğal altında olduğunu deyil, işğaldan azad olduğunu qeyd edirik, işğaldan azad edilən şəhərlərimizdə bayrağımızı ucaldırıq, bu torpaqlarda quruculuq işləri aparırıq, qaçqın və məcburi köçkünlərimiz doğma torpaqlarına qayıdır. Mədəniyyət paytaxtımız olan Şuşada beynəlxalq səviyyəli konfranslar, festivallar keçiririk. Bununla uğurlarımız bitmədi, biz artıq Xankəndidə bayrağımızı ucaltdıq və bir daha zəfər sevincini yaşadıq.

Bu gün bizim misli olmayan qələbəmizin, bir xalq və dövlət kimi qüdrətimizin tarixə yazıldığı gündür, bu gün bizim şərəf və qürur günümüzdür.

8 noyabr Azərbaycanda İkinci Qarabağ müharibəsində qələbə şərəfinə qeyd edilən gündür. Bu eyni zamanda həm anım, həmdə bayram günümüzdür, kədərimizlə sevincimizin qarışdığı gündür. 

Ermənistanla 44 gün davam edən müharibə zamanı 4 oktyabrda Cəbrayıl, 17 oktyabrda Füzuli, 20 oktyabrda Zəngilan, 25 oktyabrda Qubadlı və 8 noyabrda Şuşa şəhəri işğaldan azad edildi.

Azərbaycan xalqının sevincinin həddi-hüdudu yox idi, bu qələbə xalq və dövlət birliyinin, dövlət başçısının müdrikliyi və çevik siyasəti nəticəsində, şəhidlərimizin və qazilərimizin canı və qanı sayəsində qazanıldı.

Şuşa şəhərinin və onun işğaldan azad edilməsinin tarixi əhəmiyyəti nəzərə alınaraq Zəfər Günümüzün hər il noyabrın 8-də təntənəli şəkildə qeyd edilməsi qərara alındı. Azərbaycanın Zəfərə çatmasında Türkiyənin və Pakistanın mənəvi və siyasi dəstəyi, qardaşlığı böyük rol oynadı.

Azərbaycan xalqının əzmi və iradəsi, iqtisadi gücü, müasir ordu quruculuğu və xalq-iqtidar birliyi ölkəmizin İkinci Qarabağ müharibəsində qələbəsini təmin edən mühüm amillər oldu.

Zəfər Günün Mübarək, Azərbaycan! Uğurlarımız daimi və davamlı olsun!