“Hamiləlik dövründə qadının qida rasionu həm öz sağlamlığı, həm də dölün inkişafı üçün həyati əhəmiyyət daşıyır”.

Bunu yerli radio kanallardan birinə müsahibəsində mama-ginekoloq Sahilə Vəliyeva deyib.

Onun sözlərinə görə, bu müddətdə orqanizm daha çox enerji, vitamin, mineral və zülal ehtiyac duyulur:

“Əgər bu tələblər qarşılanmazsa, həm ana, həm də döl üçün müxtəlif sağlamlıq problemləri yarana bilər. Ananın sağlamlığına təsirlər arasında ən çox rast gəlinən problemlərdən biri qan azlığıdır. Dəmir və fol turşusu çatışmazlığı hamilələrdə tez yorulma, halsızlıq və başgicəllənmə ilə özünü göstərir. Kalsiumun kifayət qədər qəbul edilməməsi gələcəkdə sümük əriməsi riskini artırır və ananın sümükləri zəifləyir. Vitamin və mineral çatışmazlığı isə immuniteti zəiflədir və ananı yoluxucu xəstəliklərə qarşı daha həssas edir. Əgər tərəvəz və lif az qəbul olunarsa, qəbizlik və bağırsaq problemləri kimi həzm pozğunluqları tez-tez müşahidə oluna bilər”.

S.Vəliyeva bildirib ki, dölün inkişafına təsirlər də ciddi nəticələrə səbəb ola bilər:

“Ana kifayət qədər qida qəbul etmədikdə uşaq normadan az çəki ilə doğula bilər. Protein və vitamin çatışmazlığı körpənin zehni və fiziki inkişafına mənfi təsir göstərir və onun immunitetini zəiflədir. Fol turşusu çatışmazlığı isə sinir borusu qüsurlarının yaranmasına gətirib çıxara bilər. Ana bətnində düzgün qidalanmayan uşaqlar böyüdükdə ürək-damar xəstəliklərinə, şəkərə və piylənməyə daha meyilli ola bilərlər. Hamiləlik dövründə sağlam qidalanma və düzgün həyat tərzi həm ana, həm də körpə üçün mühüm əhəmiyyət daşıyır. Buna görə də bəzi əsas tövsiyələrə əməl etmək vacibdir”.

Mama-ginekoloq sonda qeyd edib ki, qidalanma ilə bağlı olaraq hər gün balanslı şəkildə zülal, vitamin və minerallar qəbul edilməlidir:

“Pəhrizdə təzə meyvələr, tərəvəzlər, süd məhsulları, balıq və qoz-fındıq mütləq yer almalıdır. “Fast-food”, qazlı içkilər və hazır məhsullar isə minimuma endirilməlidir”.

Bununla yanaşı, hərəkətlilik məsələsində diqqət yetirilməlidir.

“Müasir dövrdə bir çox qadın oturaq iş rejimində çalışır və az hərəkətli həyat tərzi sürür. Lakin hamiləlik dövründə bu vəziyyət əlavə risklər yaradır və həm ananın, həm də dölün sağlamlığına mənfi təsir göstərir”.

Onun sözlərinə, görə fiziki sağlamlığa təsirlər arasında çəki artımı əsas problemlərdən biridir:

“Hərəkətsizlik piylənməni sürətləndirir və bu, hamiləlik şəkəri ilə yanaşı, yüksək qan təzyiqi riskini də artırır. Uzun müddət hərəkətsiz qalmaq bel, kürək və ayaqlarda ağrılara səbəb olur. Eyni zamanda, oturaq həyat tərzi qan dövranını zəiflədir, bu isə ayaqlarda şişkinlik, damarların genişlənməsi və tromb riskinin artmasına gətirib çıxarır. Psixoloji təsirlər də diqqətdən kənarda qalmamalıdır. Az hərəkət edən hamilələrdə stress və gərginlik daha çox müşahidə olunur. Bunun səbəbi hərəkət zamanı endorfin hormonunun ifrazının artması, hərəkətsizlikdə isə onun azalmasıdır. Nəticədə hamilə qadınlarda əhval dəyişiklikləri, yuxusuzluq, yorğunluq və hətta depressiya halları baş verə bilər”.

S.Vəliyeva bildirib ki, dölün inkişafına təsirləri də mühümdür:

“Hərəkətsizlik qan dövranını zəiflədir və bu, dölün oksigen və qida maddələri ilə təminatını azalda bilər. Əzələlərin zəifləməsi isə doğuş prosesini çətinləşdirir və doğuşun gedişinə mənfi təsir göstərir. Hərəkət və həyat tərzi ilə bağlı olaraq həkim icazəsi ilə yüngül gəzintilər və hamiləlik üçün xüsusi idman məşqləri faydalıdır. Oturaq iş zamanı hər bir saatdan bir qısa hərəkət etmək tövsiyə olunur. Bundan əlavə, meditasiya və nəfəs məşqləri həm ananın rahatlığı, həm də körpənin sağlam inkişafı üçün müsbət təsir göstərir”.