Süd vəzi xərçəngi qadın onkoloji xəstəlikləri arasında birinci yer tutur.

TƏBİB-in Strateji inkişaf departamentinin Korporativ əməkdaşlıq şöbəsinin müdiri Nigar Rüstəmli Ümumdünya süd vəzi ilə mübarizə ayı” çərçivəsində “Xərçəngdən güclüsən” mövzusunda keçirilən tədbiri çərçivəsində jurnalistlərə açıqlamasında deyib ki, 22 rayonda 2 439 qadın paralel 2 istiqamət üzrə mammoqrafiya müayinəsindən keçib.

TƏBİB rəsmisi qeyd edib ki,11 rayon üzrə nəticələrin təhlili aparılıb:

“1.219 nəfərdən 386-da BI-RADS 3 (Böyük ehtimalla xoşxassəlidir (təxminən 98%, 3–6 ay sonra yenidən yoxlanılmalıdır), 51 nəfərdə isə BI-RADS 4 ( Xərçəng riski var. Biopsiya məsləhətdir) aşkarlanıb

Ərazi Bölmələrini İdarəetmə Birliyinin (TƏBİB) icraçı direktorunun müavini Anar İsrafilov tədbirdə çıxışı zamanı bildirib ki, dünyada hər səkkiz qadından biri süd vəzi xərçənqindən əziyyət çəkir. Hər il minlərlə qadın süd vəzi xərçəngindən dünyasını dəyişir.

Anar İsrafilov onuda qeyd edib ki, qadınlar vaxtında müalicəyə cəlb olunduqda onların müalicədən sonra 5 illik yaşama şansı 90-99 faiz arasındadır: “40-69 yaşarası bütün qadınlar iki ildən bir müayinədən keçməlidirlər. Süd vəzi xərçəngi ilə mübarizədə maarifləndirmə çox vacibdir. Erkən aşkarlanma mammoqrafiya nəticəsində müəyyən olunur. Bu çox sadə bir müayinədir. TƏBİB tərəfindən iki mobil mammoqrafiya cihazı vasitəsilə respublikada müayinələr aparılır”.