Azərbaycan Mərkəzi Bankı (AMB) tərəfindən “Maliyyə texnologiyaları və rəqəmsal transformasiya” mövzusunda təlim sessiyaları keçirilib.

AMB-dən verilən məlumata əsasən, ali təhsil müəssisələrində rəqəmsal maliyyə savadlılığının artırılması məqsədi ilə Bakı Dövlət Universiteti, Azərbaycan Respublikası Prezidenti yanında Dövlət İdarəçilik Akademiyası və Azərbaycan Texniki Universitetinin tələbələri üçün “Maliyyə texnologiyaları və rəqəmsal transformasiya” mövzusunda təlim sessiyaları keçirilib.

Dörd gün davam edən təlimlər çərçivəsində “Açıq bankçılıq” və “Paylanılmış öz müştərini tanı” konsepsiyaları, virtual aktivlər, ödəniş sistemləri və innovasiyalar, rəqəmsal fırıldaqçılıq halları və kibertəhlükəsizlik, datanın idarəedilməsi və məlumatların təhilili proseslərində süni intellektin tətbiqi imkanları kimi əsas mövzular əhatə olunub. Təlim iştirakçıları həmçinin Mərkəzi Bankın edu.e-cbar.az, bizimpullar.az və infobank.az kimi elektron maarifləndirmə resursları ilə də tanış olublar.

Mərkəzi Bankın nümayəndələri tərəfindən keçirilən sessiyalar zamanı iştirakçılara həm nəzəri biliklər, həm də praktiki tövsiyələr təqdim olunub, eyni zamanda maliyyə texnologiyalarının gələcək inkişaf istiqamətləri və qlobal maliyyə trendləri barədə geniş məlumat verilib.

Təlimin sonunda iştirakçılar öyrəndikləri bilikləri ümumiləşdirilmiş tapşırıqlar üzərində tətbiq edərək təqdimatlar ediblər. Təlimi müvəffəqiyyətlə başa vuran tələbələrə sertifikatlar təqdim olunub.