Ümumdünya Ticarət Təşkilatı (ÜTT) bu il üçün qlobal ticarətə dair artım proqnozunu 2,4 faizə qaldırıb, lakin 2026-cı il üçün zəif artım barədə xəbərdarlıq edib.

ÜTT “Qlobal Ticarət Göstəriciləri və Statistika Hesabatı”nın yenilənmiş versiyasında qeyd edilib ki, qlobal mal ticarəti bu ilin ilk yarısında illik müqayisədə 4,9 faiz artaraq gözləntiləri üstələyib. Bu artıma süni intellektlə bağlı məhsullara tələbin artması və Şimali Amerikada gömrük rüsumlarının artırılmasından öncə idxalda yaranan sıçrayış təsir göstərib. Süni intellektlə əlaqəli yarımkeçiricilər və telekommunikasiya avadanlıqları kimi məhsullar ilin ilk 6 ayında ümumi ticarət həcminin təxminən yarısını təşkil edib.

ÜTT iqtisadçıları bu gözlənilməz artımın təsiri ilə 2025-ci il üçün ticarət artımı proqnozunu avqustda açıqlanan 0,9 faizdən 2,4 faizə qaldırıblar. Bununla belə, bu göstərici 2024-cü ildə qeydə alınan 2,8 faizlik artımla müqayisədə müəyyən zəifləmə deməkdir.

İqtisadçılar bildiriblər ki, ilin ilk yarısında qlobal ticarətdəki artımın nə qədərinin makroiqtisadi amillərlə bağlı olduğunu müəyyənləşdirmək çətindir. Onlar 2025-ci ilin ikinci yarısı və 2026-cı il üçün “daha az nikbin” mənzərə gözləyirlər.

Bu səbəbdən ÜTT 2026-cı ilə dair artım proqnozunu avqustdakı 1,8 faizdən 0,5 faizə endirib. Bu düzəliş ABŞ Prezidenti Donald Trampın müxtəlif ölkə və sektorlar üzrə tətbiq etdiyi gömrük rüsumlarının təsirinin 2026-cı ilə ötürülməsini göstərir.