Gələn ildən etibarən İslam bankçılığı məhsulları Azərbaycan bazarında təqdim olunacaq.

Azərbaycan Mərkəzi Bankının (AMB) Maliyyə sektorunun dayanıqlı inkişafı departamentinin direktoru Rüstəm Tahirov II Azərbaycan Halal Biznes (AZHAB) Forumunda onuda bildirib ki, Mərkəzi Bank beynəlxalq təcrübəni nəzərə alaraq mərhələli və praqmatik strategiya qəbul edib.

“Bu strategiyaya əsasən, ilkin mərhələdə İslam bankçılığı məhsulları ənənəvi banklar daxilində “İslam pəncərəsi” modeli vasitəsilə təqdim olunacaq. Bu, bazarda tələbatın sınaqdan keçirilməsinə, iştirakçıların məhsullarla tanış olmasına və gələcəkdə daha geniş həcmli məhsul və həllərin tətbiqinə şərait yaradacaq”, – o qeyd edib.

AMB rəsmisi vurğulayıb ki, bu mərhələli strategiyanın icrası üçün Mərkəzi Bank konkret yol xəritəsi müəyyənləşdirib və bu xəritəni dörd əsas istiqamətə bölmək olar.

“Birincisi, ilkin mərhələdə tətbiq olunacaq məhsulların müəyyənləşdirilməsidir. Bunun üçün Mərkəzi Bank banklarla, sənaye assosiasiyaları və ekspertlərlə müzakirələr apararaq müştəri tələblərini və bazar ehtiyaclarını qiymətləndirib, tətbiq oluna biləcək məhsulların siyahısını müəyyən edib. Bu mərhələ artıq tamamlanıb. İndi isə həmin məhsulların tətbiqini təmin etmək üçün hüquqi və tənzimləyici baza hazırlanır. Bu, Mülki Məcəllə, Vergi Məcəlləsi, Banklar haqqında qanun və digər normativ aktlara dəyişiklikləri əhatə edir. Həmin dəyişikliklər bank sektoruna təqdim olunub və hazırda onlardan gələn rəy və təkliflər toplanır. Mərkəzi Bank bu rəyləri yekunlaşdıraraq ilin sonunadək hökumətlərarası razılaşdırma mərhələsinə təqdim etməyi planlaşdırır”, – AMB rəsmisi planları açıqlayıb.

R. Tahirov qeyd edib ki, yol xəritəsinin üçüncü əsas sütunu potensialın və biliklərin artırılmasıdır.

“Bu, çox vacib və həlledici elementdir. Bu məqsədlə biz Türkiyə, Pakistan, Qırğızıstan və digər ölkələrin müvafiq qurumları ilə əməkdaşlığa başlamışıq. Xüsusilə, Pakistan Mərkəzi Bankı ilə birgə Azərbaycan Mərkəzi Bankının nəzarət və tənzimləyici əməkdaşları üçün təlim proqramı təşkil edilib. Bu istiqamətdə fəaliyyətlərimizi davam etdirməyi planlaşdırırıq. Hüquqi və tənzimləyici baza üzrə minimal tələblər formalaşdıqdan sonra, banklar müəyyən İslam bankçılığı məhsullarını “İslam pəncərəsi” vasitəsilə təqdim etməyə başlaya biləcəklər. Mərkəzi Bank bu ilkin mərhələnin gedişatını izləyəcək, nəticələri qiymətləndirəcək və əldə olunan təcrübəyə əsaslanaraq növbəti mərhələlər, əlavə məhsullar və tənzimləyici çərçivənin təkmilləşdirilməsi istiqamətində qərarlar qəbul edəcək. Biz bu prosesdə bütün yerli və beynəlxalq tərəfdaşlarla sıx əməkdaşlıq etməyə hazırıq və əminik ki, gələn ildən etibarən İslam bankçılığı məhsulları ölkə bazarında təqdim olunacaq”, – deyə AMB rəsmisi vurğulayıb.

İslam İnkişaf Bankının (IsDB) Qabaqcıl Təcrübə Mərkəzinin rəhbəri Samir Elesavi tədbirdə çıxış edərkən bildirib ki, 2027-ci ilə qədər qlobal halal məhsullarına çəkilən xərclərin təxminən 3 trilyon dollara çatacağı gözlənilir.

Onun sözlərinə görə, İslam Əməkdaşlıq Təşkilatına (İƏT) üzv ölkələr daxilində halal məhsulların idxalı 2022-ci ildəki 359 milyard dollardan 2027-ci ildə təxminən 492 milyard dollara yüksələcək. Bu isə halal iqtisadiyyatının nəhəng potensialını əks etdirir.

O qeyd edib ki, bu artım iqtisadi inkişaf, investisiyaların cəlbi, ticarətin stimullaşdırılması və yeni iş yerlərinin yaradılması üçün geniş imkanlar açır.

“Halal sənayesi İslam İnkişaf Bankına üzv ölkələr üçün davamlı və inklüziv artımın əsas hərəkətverici qüvvələrindən birinə çevrilir,” – deyə Elesavi vurğulayıb.

O qeyd edib ki, strateji mövqeyi və sürətlə inkişaf edən iqtisadiyyatı sayəsində Azərbaycan qlobal halal tədarük zəncirində aparıcı mövqe tuta bilər.

“Halal məhsullar üzrə sənaye parklarının yaradılması və sertifikatlaşdırma sisteminin inkişafı ölkənin beynəlxalq bazarlardakı mövqeyini daha da gücləndirəcək,” – deyə o əlavə edib.

Elesavi həmçinin qeyd edib ki, halal sektorunun rəqəmsallaşdırılması və blokçeyn kimi texnologiyaların tətbiqi məhsullara şəffaflıq və etibarlılıq qazandıracaq. O, Azərbaycanın yeni dördkateqoriyalı halal sertifikatlaşdırma sistemini tətbiq etməsi və Azərbaycan Standartlaşdırma İnstitutunun Türkiyənin Halal Akkreditasiya Agentliyi tərəfindən akkreditasiyadan keçməsi münasibətilə təbrik edib.