Azərbaycanın Dövlət Su Ehtiyatları Agentliyi (ADSEA) su tarifləri ilə bağlı olaraq Türkiyə və Avropa ölkələrinin təcrübələrini araşdırıb və ölkələrdə geniş tətbiq edilən mexanizmlərdən biri olan diferensial tarifin tətbiqini nəzərdən keçirir.

Bakıda keçirilən II Milli Rəqabət Forumu çərçivəsində panel müzakirəsi zamanı Azərbaycan Dövlət Su Ehtiyatları Agentliyinin sədrinin müşaviri Əsəd Şirinov onuda deyib ki, bu məsələ “Sudan səmərəli istifadə üzrə Milli Su Strategiyası”nda da öz əksini tapıb. “Strategiyada hədəf kimi göstərilib: “Hazırda bu məsələnin təhlili aparılır. Təhlil başa çatdıqdan sonra müvafiq təklifimizi Tarif Şurasına təqdim edəcəyik”.

Ə.Şirinov deyib ki, diferensial tarif əsasən aşağı gəlirli təbəqəni qorumağa xidmət edir:

“Yəni, onlar üçün daha güzəştli qiymətlər tətbiq olunur. İkinci mərhələdə daha çox su istifadə edənlər üçün tariflər daha yüksək müəyyənləşdirilir ki, qənaət təşviq edilsin. Bundan əlavə, kommersiya subyektləri var ki, onlar sudan istifadə edərək gəlir əldə edirlər. Onlar üçün də ayrıca, fərqli tariflər müəyyənləşdirilir. Bu məsələ üzərində iş davam edir, hələ təklifimizi rəsmi olaraq təqdim etməmişik”.

Ə.Şirinov vurğulayıb ki, adətən diferensial tarif deyəndə insanlar qiymətlərin bahalaşacağını düşünürlər:

“Diferensial tarifin məqsədi isə aşağı gəlirli əhalini qorumaq, onlara güzəştli qiymətlər vermək, kommersiya və çox su istifadə edən obyektlər üçün isə tarifləri daha düzgün səviyyədə müəyyən etməkdir”.