İngiltərədə Sara Mallali yeni Kenterberi arxiyepiskopu təyin olunub.

Kenterberi Kilsəsi 1 400 illik tarixə malikdir və ilk dəfədir ki, kilsəyə qadın rəhbərlik edəcək.

Bununla da 63 yaşlı Mallali dünyada 85 milyonluq anglikan icmasının da rəsmi rəhbəri olub.

Kilsənin keçmiş rəhbəri Castin Uelbinin ötən il uşaq istismarını gizlətmə qalmaqalı səbəbilə istefasından sonra aparılan islahatlar nəticəsində qadınların yepiskop kimi təyin olunmasına icazə verilib. Bu dəyişiklik indi onların İngiltərənin rəsmi kilsəsində ən yüksək vəzifəyə gətirilməsini mümkün edir.

“Əgər yeni arxiyepiskop bir qadın olsa, bu inanılmaz dərəcədə həyəcanverici olar. Bu, 597-ci ildən başlayan tarixdə ilk dəfə baş verəcək… Bu, çox mühüm hadisə olar”, – deyə Kenterberi dekanı Devid Monteyt bildirib.

Ən yaxın namizədlər arasında üç qadın yepiskop var:

Kilsənin ilk qadın yeparxiya yepiskopu Reyçel Trevik, 1979-cu il İslam İnqilabından sonra valideynləri ilə birlikdə qaçqın kimi Britaniyaya gələn, iran əsilli yepiskop Quli Fransis-Dehqani və Londonda əsas yeparxiyaya rəhbərlik edən yepiskop Sara Mallali 106-cı Kenterberi arxiyepiskopu olmaq üçün bukmekerlərin siyahısında öncüllər arasındadır.

Xristianlığın qaranlıq və müəmmalı səhifələrindən biri qadın Papessa haqqında əfsanədir. Papa İoanın (Papessa İoanna) hekayəsi orta əsrlərin ən məşhur əfsanələrindən biridir. Versiyalardan birinə görə, İoanna Maynsdan olub, başqasına görə o, ingilis olub. O, kişi paltarı geyinərək sevgilisi ilə Afinaya səyahət edib və orada bir çox peşələrə yiyələnib. Sonra o, Romaya köçərək, burada liberal sənət professoru olur və geniş şöhrət qazanır. İstedadları sayəsində o, tez bir zamanda Kilsənin sıralarında yüksəlir, Kuriyanın birinci katibi, sonra kardinal və papa olur. Bir neçə il sonra İoanna hamilə qalır. Pasxa korteji Müqəddəs Klement kilsəsi ilə Neron Kolizeyi arasındakı dar bir xiyabandan keçərək Müqəddəs Pyotr Bazilikasından Lateran sarayına doğru hərəkət edərkən, İoanna doğuş sancısı keçirir, atından yıxılır və öldürülür. Başqa bir versiyaya görə, o, dini həssaslıqları təhqir olunmuş dindarların özləri tərəfindən öldürülür.

Bu gün artıq bəşəriyyətin təfəkkürü qadın arxiyepiskopu qəbul edəcək qədər inkişaf edib.