“Qrip daxil olmaqla bütün kəskin respirator virus infeksiyaları ümumi (bədən hərarətinin yüksəlməsi, ümumi zəiflik, halsızlıq, iş qabiliyyətinin azalması və s.) və əsasən yuxarı tənəffüs yollarının zədələnməsi əlamətləri (boğaz ağrısı, ösrürək, burun tutulması və ya axması və s.) ilə təzahür edir”.

Səhiyyə Nazirliyinin mütəxəssis-eksperti, infeksionist Təyyar Eyvazov yerli radiokanallardan birinə müsahibəsində deyib ki, bu qrupa daxil olan ayrı-ayrı infeksiyaları klinik mənzərəyə görə ayırmaq çox çətindir və bəzən laborator təsdiq tələb edə bilər.

“Bir çox respirator infeksiyaların özünə xas olan gediş xüsusiyyətləri də mövcuddur. Məsələn, qrip infeksiyası daha çox sirkulyator pozğunluqlar, yüksək hərarət, güclü baş, əzələ və oynaq ağrıları, traxeya və iri bronxların zədələnməsinin nəticəsi olaraq quru öskürək, digər respirator virus infeksiyalardan fərqli olaraq burun axma kimi kataral əlamətin zəif olması və ya olmaması, göz almalarının hərəkəti zamanı ağrı, işıqdanqorxma, göz yaşarması, konyunktivit kimi simptomlarla seyr edilir. Bəzən isə bu hallar fəsadlaşa bilir. Qrip və digər kəskin respirator virus infeksiyalar zamanı orta qulağın iltihabı, bronxit, bəzən pnevmoniya, nadir hallarda meningit və ensefalit kimi ağır fəsadlar inkişaf edə bilər”.

Nazirliyin mütəxəssis-ekspert bildirib ki, qrip və digər mövsümi infeksiyalar zamanı insanın immuniteti müəyyən qədər zəifləyir və ikincili bakterial infeksiyaların qoşulması üçün şərait yaranır, bir çox hallarda mövcud xroniki infeksiya ocaqları və xəstəliklər aktivləşir.

Ekspert qeyd edib ki, mövsüm ərzində bu tip xəstəliklər təkrarlanır. Bu ona görə baş verir ki, hər mövsümdə qripin 3-4 ayrı-ayrı ştamı və bir neçə kəskin respirator virus infeksiyaları dövr edir.

Onun sözlərinə görə, hansısa bir virus infeksiyasını keçirdikdən sonra orqanizmdə həmin törədicinin məhz keçirilmiş ştamına qarşı müxtəlif müddətli və müxtəlif güclü immunitet formalaşır.

“Bu immunitet insanı həmin infeksiyanın digər ştamlarından və digər infeksiyalardan qorumur. Ümumiyyətlə payız-qış mövsümündə hər bir sağlam insanın 2-3 dəfə bu cür infeksiyalara tutulması və onladan fəsadsız sağalması normal hal kimi qəbul olunur. Qrip və digər kəskin respirator infeksiyalardan sonra ümumi zəiflik, tez yorulma, iş qabiliyyətinin tam bərpa olmaması, yuxunun pozulması, yaddaşın zəifləməsi, diqqətin yayğın olması, baş ağrıları və s. kimi astenizasiya əlamətləri rast gəlinir. Bu hallarda asteniya əlamətlərinin davam müddəti bir neçə faktordan asılı olaraq dəyişə bilər. Əksər hallarda astenizasiya xəstəlikdən sonrakı 1-2 həftə ərzində davam edir. Lakin keçirilmiş infeksiyanın ağırlığından, fəsadların olub-olmamasından (məsələn, pnevmoniya, bronxit və s.), pasiyentin yaşından (uşaq, ahıl şəxs), onun əziyyət çəkdiyi xroniki xəstəliklərdən (birinci növbədə tənəffüs orqanlarının, sinir sisteminin və s.), onun fərdi xüsusiyyətlərindən, immun sisteminin vəziyyətindən və s. asılı olaraq bərpa dövrü daha uzun ola bilər”.

T.Eyvazov qeyd edib ki, əgər bu əlamətlər 2 aydan çox davam edərsə, bu hal xroniki yorğunluq sindromu adlanır və həkimə müraciət etmək tövsiyə olunur.

“Astenizasiyanın tez ötüb keçməsi üçün açıq havada gəzintilər, kifayət qədər istirahət və yuxu, vitaminli-mineral tərkibli, zülallarla zəngin qidalanma, siqaret çəkmək və alkohol qəbulu kimi zərərli vərdişlərdən imtina, stres və emosional gərginliklərdən mümkün qədər yayınmaq məsləhət görülür”.