Qarşımızda olan əsas məqsədlərdən biri informasiya sahəsində olan təhlükəsizliyi təmin etməkdir.

Azərbaycan Respublikasının Medianın İnkişafı Agentliyinin Beynəlxalq əlaqələr və sənədlərlə iş departamentinin direktoru Rasim Bağırov II Azərbaycan – Özbəkistan Media Forumu çərçivəsində “Rəqəmsal dövrdə media tərəfdaşlığı: İnformasiya təhlükəsizliyi istiqamətində birgə təşəbbüslər” mövzusunda panel sessiyada çıxış edərkən deyib ki, informasiya təhlükəsizliyindən danışırıqsa, bu məsələ hazırda prioritet mövzulardan biridir.

“Məlumat sahəsində sərhədlər yoxdur. Qarşımızda olan əsas məqsədlərdən biri informasiya sahəsində olan təhlükəsizliyi təmin etməkdir. Kibertəhlükəsizlik məsələlərinə gəldikdə isə bilirik ki, bunlar informasiya sahəsindən geridə qala bilməzlər”.

Onun sözlərinə görə, auditoriyanı öyrətmək lazımdır ki, onlar məlumatla dezinformasiyanı ayıra bilsinlər.

” İnformasiya təhlükəsizliyini təmin etmək baxımından danışmaq istərdim ki, biz bu sahədə önləyici və sonradan gələn üsulları önərə bilərik. Bu sahədə önləyici tədbirlər əhalinin maarifləndirilməsidir. Bu istiqamətdə biz müxtəlif tədbirlər həyata keçiririk. Hər il dekabr ayında biz media savadlılığı həftəsi həyata keçiririk və bu layihəyə müəllimləri, tələbələri hətta şagirdləri cəlb edirik. Bu ona gətirib çıxarır ki, insanlar məlumatlanır və informasiyanı daha doğru şəkildə qəbul edə, anlaya bilir”.

Azərbaycan və Özbəkistan arasında baş verən tərəfdaşlıq çərçivəsində müxtəlif tədbirlər baş tutur.

“Düşünürük ki, bu ənənəyə davam edəcəyik. İnformasiya dövründə tətbiq etdiyimiz üsullar tez- tez dəyişir. Buna görə də bizim sinergiyanı qorumaq üçün Özbəkistan kimi tərəfdaşlara ehtiyacımız var”, deyə Rasim Bağırov əlavə edib.

Rəqəmsal dövr media və informasiya kontekstində texnologiyanın sürətlə inkişaf etdiyi və məlumatların geniş miqyasda mübadilə olunduğu bir mühitdir.

Azərbaycan Respublikası Audiovizual Şurasının Aparat rəhbəri Fazil Novruzov Forumda çıxış edərkən deyib ki, belə mühitdə informasiya təhlükəsizliyi ən vacib məsələlərdən biridir.

“İnformasiya təhlükəsizliyi yalnız məlumatların qorunmasını deyil, eyni zamanda həmin məlumatların hərəkət etdiyi mühitin təmizliyi və nizamlı olmasının təmin edilməsini ehtiva edir. Müasir cəmiyyətdə informasiya təhlükəsizliyinə mütləq nail olunması mümkün olmasa da, bu istiqamətdə məqsədlərə çatmaq üçün bir sıra alətlər və vasitələr mövcuddur. Bu alət və vasitələrin arasında cəmiyyətin intellektual səviyyəsinin yüksəldilməsi, media və informasiya savadlılığının, rəqəmsal biliklərin artırılması xüsusi əhəmiyyət kəsb edir”.

“Sadaladığım bu alətlərdən son illərdə ölkəmizdə kifayət qədər uğurla istifadə olunur. Bu istiqamətdə dövlət qurumları, media subyektləri, ictimai birliklər xeyli işlər görür. Təbii ki, bu kontekstdə Azərbaycan-Özbəkistan Media Forumunun təşkilatçısı olan Medianın İnkişafı Agentliyinin işi xüsusilə vurğulanmalıdır. Son illər agentlik tərəfindən media savadlılığı istiqamətində həyata keçirilən fəaliyyət hazırda dünyada bu sahədə mövcud olan ən uğurlu təcrübələrə əsaslanır”,- deyə o vurğulayıb.