Türk Dövlətləri Təşkilatının (TDT) baş katibinin müavini Ömər Kocaman Türk Dövlətləri Təşkilatının 12-ci sammitinin keçiriləcəyi tarixi və yeri açıqlayıb.

Türk Dövlətləri Təşkilatının “Regional sülh və təhlükəsizlik” mövzusunda XII Sammiti 6-7 oktyabr tarixlərində Qəbələdə keçiriləcək.

Ömər Kocaman Bakıda TDT üzv dövlətlərin beyin mərkəzlərinin konfransında çıxış edərkən onuda vurğulayıb ki, türk dövlətləri arasında ortaq tarix, dil, mədəniyyət və ənənələrə əsaslanan qardaşlıq münasibətləri mühüm strateji potensiala malikdir.

O xatırladıb ki, Türk Dövlətləri Təşkilatının yaradılması haqqında saziş 2009-cu il oktyabrın 3-də Naxçıvanda imzalanıb və Azərbaycanın təşkilat daxilində əməkdaşlığın möhkəmləndirilməsində xüsusi rolu olub.

“Türk dünyası geniş coğrafiyaya, böyük hərbi potensiala, zəngin resurslara, nəqliyyat dəhlizlərinə və gənc, sürətlə artan əhaliyə malikdir. Biz birgə səylər göstərməliyik ki, TDT dünya arenasında mühüm oyunçuya və güc mərkəzinə çevrilsin”,- deyə baş katib müavini bildirib.