AZCON Holding şirkətlərindən olan “Bakı Metropoliteni” QSC tərəfindən Bənövşəyi xəttin layihə adı “B-04” olan stansiyasında tikinti işlərinin növbəti mərhələsinə start verilib.

Tikinti işlərinin gedişi ilə yerində tanış olmaq üçün əraziyə mediatur təşkil olunub.

Bakı Metropoliteni Q apalı Səhmdar Cəmiyyətinin mətbuat katibi Bəxtiyar Məmmədov jurnalistlərə açıqlamasında deyib ki, “Port Baku” yaxınlığında metronun yeni stansiyasının inşası nəzərdə tutulub.

B. Məmmədov bildirib ki, metronun Xətai stansiyasının yaxınlığında Yaşıl xəttə daha bir keçid imkanı yaradılacaq.

“Bununla yanaşı, Babək prospekti üzərində şəhər istiqamətində ilk stansiyanın tikintisi həyata keçiriləcək. Sözügedən layihə prospekt boyunca sərnişinlərin hərəkətini asanlaşdıracaq”, – o əlavə edib.

B.Məmmədov vurğulayıb ki, Bakı Metropolitenin üç stansiyasının infrastrukturu xüsusilə öyrənilərək həm havalandırma, həm də soyutma sistemlərinin tətbiqi istiqamətində planlı işlərə başlanılıb.

“Yaxın günlərdə layihələndirmə və ekspertiza kimi məsələlər də həllini tapacaq”,- deyə bildirib.

Metronun Avtovağzal stansiyasından hərəkətə başlayan sərnişin B5 stansiyasından Nizami stansiyasına keçməklə hərəkətini Yaşıl xətt üzrə davam etdirəcək.

“Nizami stansiyasından sonra Sahil stansiyasının yaxınlığında da bir stansiya inşa olunacaq və artıq qırmızı xəttə keçid olacaq”.

Vurğulanıb ki, Avtovağzaldan hərəkətə başlayan sərnişin həmin stansiyadan Sahil stansiyasına keçməklə Həzi Aslanova qədər başqa növ nəqliyyata keçmədən hərəkətini davam etdirə biləcək.

“Bakı Metropoliteni”ndə yeni tədris mövsümündən başlayaraq iş günlərində günün pik saatlarında olmaq şərtilə, hərəkət qrafiki 28 May stansiyasından Əhmədli stansiyasına qədər 1 dəqiqə 45 saniyə elan olunub.

Bəxtiyar Məmmədov deyib ki, Bakı Metropoliteninin bu gün əsas problemi yaşıl və qırmızı xətlərin 28 May stansiyasında kəsişərək birləşməsidir.

“Bu səbəbdən artıq 28 May stansiyasından İçərişəhər və Dərnəgül istiqamətində qatarların hərəkəti pik saatlarda iki dəfə artır, yəni interval 3 dəqiqə 30 saniyəyə çatır. Lakin Bakı Metropolitenində bu kimi hallarla bağlı əlavə tənzimləmə tədbirləri də mövcuddur. Məsələn, yalnız bir istiqamət üzrə götürsək, səhər saatlarında Memar Əcəmi xəttində iki xüsusi sıx stansiya var: 20 Yanvar və Koroğlu. 20 Yanvar stansiyası ilə yanaşı, son dövrlərdə sərnişin axını çox olan Memar Əcəmi və İnşaatçılar stansiyalarında sıxlığı tənzimləmək məqsədilə səhər saat 08:00-dan 09:00-a qədər Memar Əcəmi stansiyasından iki qatar geri qaytarılır. Bu zaman Memar Əcəmi-Dərnəgül istiqamətində qeyd etdiyim interval iki dəfə artır”.

Bəxtiyar Məmmədov əlavə edib ki, həmin sahədə metronun texniki imkanlarına görə əlavə qatar buraxmaq mümkün deyil. Lakin bu istiqamətdə də sərnişin axını üzrə xüsusi monitorinqlər aparılır:

“Sıxlığın yaranması və sərnişin tələbatı daim nəzarətdə saxlanılır. Məsələn, səhər saatlarında Neftçilər istiqamətindən Koroğlu istiqamətinə hərəkət edən xətt üzrə ən sıx stansiya məhz Koroğludur. Bu səbəbdən saat 08:00-09:00 aralığında sərnişin axınını tənzimləmək məqsədilə bir qatar sərnişinsiz şəkildə Koroğlu stansiyasına göndərilir. Yəni, qatar Neftçilər stansiyasından sərnişin götürmədən çıxır, Koroğlu stansiyasına çatdıqdan sonra isə sərnişinlərlə yola davam edir”.

Bakı Metropolitenində yaşıl və qırmızı xətlərin ayrılması təmin ediləndən sonra qatarlar arasındakı interval minumuma endiriləcək. Bunun üçün lazım olan infrastruktur layihələri həyata keçirilməlidir:

“Bunun üçün qatarların dönüb geri qayıtması üçün kameraların inşasına ehtiyac var. Qırmızı xətt üzrə “İçərişəhər” stansiyasının arxasında, yaşıl xətt üzrə hərəkət edən qatarların dönməsi üçün isə “Xətai” stansiyasından sonrakı, Bənövşəyi xəttin şərti adı “Y-15” olan stansiyada dönmə kameraları inşa ediləcək”

Qeyd edilib ki, artıq “İçərişəhər” stansiyası ilə bağlı işlərə başlanılıb:

“Bu kameralar inşa ediləndən sonra yaşıl və qırmızı xətt üzrə hərəkət edən qatarların intervalı texniki cəhətdən mümkün ən minimal hədlərə salına bilər. Qatarların dönmə kameraları inşa edilib istifadəyə veriləndən sonra qırmızı xətt üzrə hərəkət edən qatarlar arasında interval iki dəfədən çox azalaraq, 1 dəqiqə 30 saniyəyə endirilə bilər. Qeyd edək ki, hazırda pik saatlarda qeyd edilən istiqamətlərdə interval 3 dəqiqə 30 saniyə təşkil edir”,-əlavə olunub.

Metronun “Dərnəgül” elektrik deposunun ərazisində yerüstü stansiya tikiləcək. Yerüstü stansiya metronun “yaşıl xətt”inə aid olacaq:

“Stansiya “xüsusi qrafiklə işləyəcək. Stansiyanın şərti adı “Dərnəgül deposu” adlandırılıb. Stansiya 2027-ci ilin sonuna qədər istifadəyə veriləcək”.

Metropolitendə departament rəhbəri Məmməd Rzayev jurnalistlərə açıqlamasında deyib ki, “Nizami” və “28 may” stansiyaları arasında hərəkət müvəqqəti dayandırılacaq. Xətlərin ayrılması layihəsinin tərkib hissəsində olan hər iki tunelin inşası zamanı “Nizami” və “28 may” stansiyaları arasında hərəkət müvəqqəti dayandırılacaq.

Departament rəhbəri qeyd edib ki, dayanma müddətinin uzun olmaması məqsədilə işlərin belə planlaşdırdıq ki, “28 may stansiyasının ərazisində iki ədəd yanaşma tunelinin inşasını önə salınsın və bununla da tunellərin inşası prosesində mümkün qədər qısa müddətdə hərəkətin daynamasına səbəb olsun.

“Hazırda 2 saylı şaxtada suvayvurma işlərinə başlanılıb. Eyni zamanda həmin ərazidə daha öncədən kommunikasiya işlərinin köçürülməsi tamamlanıb. 1 saylı şaxtanın ərazisi hasara alınıb və kommunikasiya xətlərinin köçürülməsi prosesi davam edir”,- deyə o əlavə edib.

Mediatur zamanı Bakmetropoliten rəsmiləri bildiriblər ki, Bənövşəyi xəttin layihə adı “B-04” olan stansiyasında tikinti işlərinin növbəti mərhələsinə inşaatla yanaşı, stansiyanın daxili infrastrukturunun qurulmasına da başlanılıb.

Hazırda xidməti sahələr və otaqların tikintisi, arakəsmələrin quraşdırılması, üzləmə işlərinə hazırlıq tədbirləri həyata keçirilir. Mərtəbələr üzrə eskalatorların quraşdırılması artıq başa çatıb, onların sazlama və sınaq işləri isə inşaatın yekun mərhələsində icra olunacaq. Paralel olaraq havalandırma və soyutma sistemlərinin, o cümlədən güclü ventilyatorların quraşdırılmasına başlanılıb.

Yeddi vaqonlu qatarların qəbul ediləcəyi sərnişin platformasının uzunluğu 144 metr olacaq. Buradan “8 Noyabr” stansiyasına qədər 1010 və 1021 metr uzunluğunda hər iki tuneldə dəmir yolu xətləri çəkilib.

Qeyd edək ki, Bakı metropoliteninin istifadəyə veriləcək 28-ci, Bənövşəyi xəttin isə 5-ci stansiyası Heydər Əliyev adına İdman-Konsert Kompleksi ilə 1 saylı Şəhər Klinik Xəstəxanası arasındakı ərazidə – Cəlil Məmmədquluzadə küçəsində yerləşir.

Ərazinin relyefi nəzərə alınaraq 29–31 metr dərinlikdə inşa olunan “B-04” stansiyası 167,7 metr uzunluğa malik olub, 4 səviyyədən ibarətdir. Səviyyələrarası keçidlər üçün 19 eskalator, fiziki imkanları məhdud sərnişinlər üçün isə 5 lift nəzərdə tutulub. Stansiyanın ümumilikdə 4 giriş-çıxışı olacaq. Hazırda onların ikisinin inşası başa çatdırılıb, digərlərində isə işlər davam etdirilir.