Bakı Dövlət Universiteti və Xəzər Universiteti “Times Higher Education” versiyasına görə “Impact Rankings 2025” qlobal reytinq cədvəlində ilk 600-ə düşüblər.

Bu gün Bakıda keçirilən Avrasiya Universitetləri Sammitində “Times Higher Education”un məlumatların idarə olunması üzrə meneceri Klara Spustek Bakı Dövlət Universitetini və Xəzər Universitetini Impact Rankings 2025 dünya reytinqində ilk 600-lüyə düşməsi münasibətilə təbrik edib.

Onun sözlərinə görə, reytinqdə Mərkəzi Asiya və Qafqaz ölkələrindən 140-dan çox universitet iştirak edib. “Siyahıda region üzrə ən çox universitet Özbəkistandan daxil olub, daha sonra Qazaxıstan və Azərbaycan gəlir”,- deyə Spustek vurğulayıb.

O əlavə edib ki, Azərbaycanda universitetlər ən fəal şəkildə 4-cü Dayanıqlı İnkişaf Məqsədi (təhsilin keyfiyyəti) üzrə iştirak edir, bundan sonra isə 8-ci Dayanıqlı İnkişaf Məqsədi (layiqli əmək və iqtisadi artım) istiqaməti gəlir.