Tibb müəssisələri beynəlxalq akkreditasiya almalıdır.

Səhiyyə naziri Teymur Musayev Birinci Azərbaycan Beynəlxalq İnvestisiya Forumu çərçivəsində keçirilən panel sessiyada onuda deyib ki, bütün tibb müəssisələrinin JCI, ISQUA kimi beynəlxalq tanınmış təşkilatlar tərəfindən akkreditasiyaya alınması məqəsədəuyğundur.

“Bu, göstərilən tibbi xidmətlərin ən yüksək standartlarının sübutu, həm də layihənin davamlılığının və rəqabət qabiliyyətinin zəmanətidir”, – deyə Teymur Musayev əlavə edib.

Nazirin sözlərinə əsasən, tibbi turizm və sağlamlıq turizmi üçün mərkəz yaratmaq ideyası var.

“Mərkəz yaşlı əhali üçün sağlamlıq xidmətlərinin idarə olunması sahəsində də unikal imkanlar təqdim edəcək. Bu, çox xüsusi bir layihədir və Səhiyyə Nazirliyi olaraq biz ona tam dəstək verəcəyik.
Qanunvericilik məsələlərinə gəldikdə isə, layihənin sürətli və effektiv icrasını təmin etmək üçün xüsusi qanunvericilik yanaşması tətbiq olunacaq. Ənənəvi və standart yanaşmalar bu layihə üçün zəruri qanunvericilik infrastrukturunu təmin edə bilməz. Bu, həm operatorlar, həm də istifadəçilər üçün hüquqi cəhətdən təmin edilmiş və təhlükəsiz bir mühit yaradacaq”, – deyə nazir qeyd edib.

Forumda çıxış edərkən Tibbi Ərazi Bölmələrini İdarəetmə Birliyi (TƏBİB) İdarə Heyətinin sədri Vüqar Qurbanov səhiyyə sektorunda kadr çatışmazlığının ən ciddi problemlərdən biri olduğunu qeyd edib.

O, bu problemin həll yolunu da göstərib: “Gələcəkdə bu sahədə kadr çatışmazlığının aradan qaldırılması üçün telesəhiyyə xidmətinin ölkəmizdə də tətbiqinə ehtiyac var”.

Qeyd edək ki, telesəhiyyə müasir informasiya-kommunikasiya texnologiyalarından istifadə etməklə tibbi xidmətlərin uzaq məsafədən göstərilməsi deməkdir. Sadə dillə desək, həkimlə xəstənin eyni yerdə olmadan, telefon, internet və ya xüsusi proqramlar vasitəsilə əlaqə quraraq müayinə, məsləhət və diaqnostika aparmasıdır.