Beynəlxalq reytinq agentliyi “Fitch” Azərbaycanda 2017-ci ildən bəri bank sektorunun orta göstəricilərinin əhəmiyyətli dərəcədə yaxşılaşdığını bildirib.

“Fitch”-in yaydığı məlumata əsasən, kreditlərin dollarlaşma səviyyəsi aşağı düşüb və aktivlərin keyfiyyəti ilə bağlı risklər azalıb.

Eyni zamanda “Fitch” mümkün çağırışlara da diqqət çəkərək bildirib ki, 2021-ci ildən bəri pərakəndə kreditləşmənin sürətli artımı sektorun həddindən artıq böyüməsinə səbəb ola bilər. Lakin Azərbaycan Mərkəzi Bankı kredit risklərinin azaldılması üçün qabaqlayıcı tədbirlər görür.

Agentlik ölkə iqtisadiyyatı üzrə yenilənmiş proqnozuna əsasən, Azərbaycanın ÜDM artımı 2025-ci ildə 3,5 faiz, 2026-cı ildə isə 2,5 faiz təşkil edəcək. Bu göstəricilər 2024-cü ildəki 4,1 faizlə müqayisədə aşağıdır.

Analitiklər qeyd ediblər ki, yavaşlamanın əsas səbəbi neft-qaz sektorundakı fəaliyyətin azalması və dünya bazarında qiymətlərin daha aşağı olmasıdır.