“Economist Intelligence Unit” (EIU) son proqnozlarına əsasən, Azərbaycanın xarici ticarət balansının qarşısdakı beş il ərzində müsbət və nisbətən sabit qalacağı gözlənilir.

EIU yaydığı məlumata əsasən, ölkənin ticarət profisiti 2025-ci ildə 13,9 milyard dollar təşkil edəcək, daha sonra isə 2026-cı ildə 10,2 milyard dollara qədər azalacaq. 2027-ci ildə profisitin 16 milyard dollar səviyyəsində olacağı, 2028 və 2029-cu illərdə isə cüzi azalmanın olacağı gözlənilir – müvafiq olaraq 15,4 milyard və 14,9 milyar dollar həcmində.

EIU proqnozuna əsasən, ixrac 2025-ci ildə 28,8 milyard dollar təşkil etdiyi halda, 2029-cu ilə qədər 33,3 milyard dollara yüksələcək. İdxal həcmi isə 2025-ci ildə 14,9 milyar dollar olduğu halda, 2029-cu ilə qədər 18,4 milyard dollara qədər qalxacaq.

Eyni zamanda, Azərbaycan Dövlət Statistika Komitəsinin məlumatları göstərir ki, 2024-cü ildə ölkənin ümumi ixrac həcmi 26,3 milyard dollar, idxal həcmi isə 21,1 milyard dollar təşkil edib. Ötən illə müqayisədə ixrac 11 faiz azalıb, idxal isə 22 faiz artıb ki, bu da 2023-cü illə müqayisədə xarici ticarət balansı profisitinin azalmasına səbəb olub.

Yaxın bir neçə il ərzində Azərbaycan mülayim inflyasiya, əmək haqqlarının stabil artımı və işsizlik səviyyəsinin tədricən azalması gözlənilir.

EIU proqnozlarına görə, ölkədə inflyasiya səviyyəsi 2025-ci ildə 4,5 faiz olduğu halda 2026-cı ildə 4,6 faizə yüksələcək, 2027-ci ildə isə 4,7 faizə çatacaq.

Orta aylıq nominal əmək haqqlarının isə 2025-ci ildəki 6 faizdən azalaraq 2026-cı ildə 5,2 faizə enəcəyi və 2027-2029-cu ilə qədər hər il 4,5 faiz səviyyəsində sabitləşəcəyi gözlənilir.

Azərbaycan Dövlət Statistika Komitəsinin məlumatına əsasən, 2024-cü ildə ölkə iqtisadiyyatında işçilərin orta aylıq nominal əmək haqqı əvvəlki illə müqayisədə 8,1 faiz artaraq 1009,2 manat təşkil edib. Ən yüksək əməkhaqları mədənçıxarma sənayesində, maliyyə və sığorta fəaliyyətində, peşəkar, elmi və texniki fəaliyyət sahələrində, həmçinin informasiya və kommunikasiya texnologiyaları sektorunda qeydə alınıb.

Bununla yanaşı, proqnozlara görə, işsizlik səviyyəsi 2025-ci ildəki 5,4 faizdən tədricən azalaraq 2029-cu ildə 4,4 faiz olacaq.