Prezident İlham Əliyev “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025–2030-cu illər üçün Dövlət Proqramı” təsdiq edilməsi haqda Sərəncam imzalayıb.

Sərəncama əsasən, qanunsuz dövriyyədən çıxarılmış narkotik vasitələrin, psixotrop maddələrin və onların prekursorlarının ilkin tədqiqatını və məhkəmə ekspertizasını aparan laboratoriyaların texniki təminatının yaxşılaşdırılması üçün əlavə tədbirlər görüləcək.

Ədliyyə Nazirliyi əsas icracı, Daxili İşlər Nazirliyi, Dövlət Gömrük Komitəsi, Dövlət Təhlükəsizliyi Xidməti isə digər icraçı qurumlar kimi təyin edilib.

Narkomaniya xəstəliyi ilə əlaqədar tibbi xarakterli məcburi tədbirlərin həyata keçiriləcəyi yeni tibb müəssisəsi fəaliyyətə başlayacaq. Tədbirlər Planına əsasən, icra müddəti 2025-2026-cı illəri əhatə edəcək.

Səhiyyə Nazirliyi əsas icracı, Daxili İşlər Nazirliyi, Maliyyə Nazirliyi, İqtisadiyyat Nazirliyi isə digər icraçı qurumlar kimi təyin edilib.

Narkotik asılılığı olan şəxslərin narkoloji xəstələr üçün fəaliyyət məhdudiyyəti nəzərdə tutulmuş peşə növü və vəzifələr üzrə işə qəbulunun qarşısının alınmasından ötrü işəgötürənin məsuliyyətinin artırılması məqsədilə normativ hüquqi bazanın təkmilləşdiriləcək. Tədbirlər Planına əsasən, icra müddəti 2025-ci ili əhatə edəcək.

Nazirlər Kabineti əsas icracı, Əmək və Əhalinin Sosial Müdafiəsi Nazirliyi, Səhiyyə Nazirliyi, Ədliyyə Nazirliyi, Daxili İşlər Nazirliyi, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupu isə digər icraçı qurumlar kimi təyin edilib.

Narkoloji xidmətin keyfiyyətinin yaxşılaşdırılması məqsədilə reabilitasiya mərkəzləri yaradılacaq.

Tədbirlər Planına əsasən, icra müddəti 2025-2030-cu illəri əhatə edəcək.

Səhiyyə Nazirliyi əsas icracı, İqtisadiyyat Nazirliyi və Maliyyə Nazirliyi isə digər icraçı qurumlar kimi təyin edilib.

Narkotik asılılığından əziyyət çəkən şəxslərin müalicəsi prosesində tətbiq üçün psixoloji dəstək proqramları hazırlanacaq. Tədbirlər Planına əsasən, icra müddəti 2025-2026-cı illəri əhatə edəcək.

Səhiyyə Nazirliyi əsas icracı, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupu isə digər icraçı qurum kimi təyin edilib.

Azərbaycan Respublikasının vətəndaşlarına, əcnəbilərə və vətəndaşlığı olmayan şəxslərə narkotik istifadəçisi kimi qeydiyyatda olub-olmaması barədə arayışların verilməsi prosesinin sadələşdiriləcək.

Tədbirlər Planına əsasən, bu məqsədlə həmin xidmətin “ASAN xidmət” mərkəzləri tərəfindən həyata keçirilməsinin təmin edilməsi üçün normativ hüquqi aktlarda dəyişiklik ediləcək. Tədbirlərin icra müddəti 2026-cı ili əhatə edəcək.

Nazirlər Kabineti əsas icracı, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, Səhiyyə Nazirliyi və Ədliyyə Nazirliyi isə digər icraçı qurumlar kimi təyin edilib.