Bu ilin birinci yarısında Hesablama Palatası tərəfindən həyata keçirdiyi kənar dövlət maliyyə nəzarəti (KDMN) tədbirləri ilə uyğunluq predmetləri üzrə cəmi 65 milyon manatlıq maliyyə pozuntusu aşkarlanıb.

Palatadan verilən məlumata əsasən, məlumat tərtib edildiyi dövrədək başa çatdırılmış KDMN tədbirləri ilə uyğunluq predmetləri üzrə büdcəyə zərərin 17,8 milyon manat olduğu hesablanıb.

Qeyd edilib ki, nəticələri rəsmiləşdirilmiş auditlər üzrə maliyyə hesabatlılığında 105,1 milyon manatlıq təhriflərə yol verildiyi aşkarlanıb ki, bunların 12,6 milyon manatı əhəmiyyətli təhriflərdən ibarət olub.

“Nəzarət tədbirlərinin nəticələri ilə bağlı zəruri addımların atılması məqsədilə 7 halda nəzarət obyektlərinə auditor hesabatı və kollegiya qərarları göndərilib. 2025-ci ilin İş Planına əsasən başa çatdırılmış nəzarət tədbirlərinin nəticələri Azərbaycan Respublikasının Milli Məclisinə və Naxçıvan Muxtar Respublikasının Ali Məclisinə təqdim olunub.

Bir tədbir üzrə Naxçıvan Muxtar Respublikasının Nazirlər Kabinetinə, üç tədbir üzrə aşkar edilmiş aidiyyəti nöqsanlarla əlaqədar səlahiyyətləri çərçivəsində tədbirlərin görülməsi məqsədilə Azərbaycan Respublikasının Maliyyə Nazirliyinə və Naxçıvan Muxtar Respublikasının Maliyyə Nazirliyinə məlumat göndərilib.

Hesabat dövründə də əvvəlki illərdə başa çatdırılmış nəzarət tədbirlərinin nəticələri üzrə qurumlar tərəfindən atılmış addımların icrasının izlənilməsi (follow-up) diqqətdə saxlanılıb, əvvəlki illərin nəzarət tədbirləri üzrə dövlət vəsaitinin bərpa təklifi ilə bağlı qalan vəsaitdən 0,9 milyon manatın hesabat tərtib olunduğu günədək pul və əvəzləşdirmə formasında bərpası təmin edilib. Əvvəlki ildə auditlər nəticəsində aşkarlanmış əhəmiyyətli təhriflərin 300 milyon manatdan çoxu üzrə müvafiq düzəlişlər edilib”, – deyə məlumatda qeyd edilib.

Cari ilin birinci yarımilində aparılmış nəzarət tədbirlərinin nəticələrini nəzərə alaraq Hesablama Palatası çox rast gəlinən pozuntularını ümumiləşmiş formada açıqlayıb.

Ən çox rast gəlinən pozuntular aşağıdakılardır:

1. Fəaliyyətin təmin edilməsi məqsədilə tələb olunan vəsaitlərin məbləğ və istiqamətinin düzgün proqnozlaşdırılmaması nəticəsində icra prosesində dövlət vəsaitinin təsdiq olunmuş təyinatının dəyişdirilməsi;

2. qurumun hüquqi aktlarla müəyyən edilmiş funksional fəaliyyətinə aid olmayan istiqamətlərdə vəsaitlərin xərc edilməsi və ya funksional fəaliyyətinin bir qisminin başqa quruma ötürülməsi ilə dövlət vəsaitinin funksional təyinatının dəyişdirilməsi və əlavə tələbatın formalaşdırılması;

3. hüquqi aktlarla müəyyən edilmiş nəqliyyat vasitələrinin say həddinə və yanacaq xərcinin normasına, beynəlxalq tədbirlərin keçirilməsi zamanı yemək, hədiyyə və s., habelə iştirakçı sayı ilə bağlı məhdudiyyətlərə riayət olunmaması fonunda artıq xərclərə yol verilməsi;

4. Azərbaycan Respublikasının “Dövlət satınalmaları haqqında” Qanununun tələbləri gözlənilməyərək ilkin satınalma planının hazırlanması, təsdiq edilməsi və dövlət satınalmalarının vahid internet portalında yerləşdirilməsinin təmin edilməməsi və ya icra prosesində satınalma planına əməl edilməməsi;

5. tender komissiyalarının fəaliyyətində yol verilmiş nöqsanların satınalmalarda hesabatlılıq və şəffaflıq prinsipləri ilə bağlı tələblərə riayət edilməməsinə, eləcə də, rəqabət mühitinin təmin olunması ilə bağlı fəaliyyətin məhdudlaşmasına şərait yaratması;

6. tələbatın düzgün formalaşdırılmaması nəticəsində satınalma müqavilələrinin bir hissəsinin icra olunmaması və ya bağlanmış müqavilələrin icra səviyyəsinin aşağı olması;

7. dövlət investisiyalarının idarəedilməsi üzrə qiymətqoymanın resurs metodunun tətbiq olunması ilə əlaqədar normativ hüquqi aktlarla müəyyənləşdirilmiş bəzi normaların düzgün tətbiq edilməməsi.