Azərbaycan Dövlət Neft Fondu (ARDNF) ötən il 7,858 milyard manat xalis mənfəət əldə edib.

ARDNF-dən verilən məlumata əsasən, bu göstərici əvvəlki illə müqayisədə 245 milyon manat və ya 3% azdır. Fond 2023-cü ili 8,103 milyard manat xalis mənfəət başa vurmuşdu.

Bununla yanaşı, ötən il ARDNF-in istiqraz gəlirləri 680,169 milyon manat, səhmlər üzrə gəlirləri 3,213 milyard manat, törəmə maliyyə alətləri üzrə zərəri 6,347 milyon manat, qızıl külçə investisiyaları üzrə gəlirləri 3,386 milyard manat, özəl səhm fondları üzrə gəlirləri 377,839 milyon manat, daşınmaz əmlak fondları üzrə gəlirləri 32,29 milyon manat, investisiya mülkiyyəti üzrə gəlirləri 84,95 milyon manat, amortizasiya olunmuş dəyərlə ölçülən maliyyə alətləri üzrə məzənnə fərqindən yaranan zərəri 108,047 milyon manat, effektiv faiz dərəcəsi metodu ilə hesablanmış faiz gəlirləri 218,351 milyon manat, sair gəlirləri 38,735 milyon manat, əməliyyat xərcləri 79,102 milyon manat təşkil edib.

Ötən ilin sonuna ARDNF-nun qızıl külçələrə investisiyaları 21,003 milyard manat olub.

Məlumata görə, bu göstərici əvvəlki illə müqayisədə 9,524 milyard manat və ya 83% çoxdur. Belə ki, 2023-cü ilin sonuna Dövlət Neft Fondunun (ARDNF) qızıl külçələrə investisiyaları 11,479 milyard manat olmuşdu.

Qeyd edək ki, ARDNF neft və qazdan əldə edilən gəlirlərin toplanmasını, səmərəli idarə edilməsini və gələcək nəsillər üçün saxlanmasını təmin edən xüsusi qurumdur. Fond büdcədənkənar, ayrıca dövlət təsisatıdır.