Bakı Fond Birjası 2030-2032-ci illərdə regional quruma çevrilə bilər.

Bakı Fond Birjasının İdarə Heyətinin sədri Ruslan Xəlilov jurnalistlərlə görüşdə deyib ki, 2030-cu il və sonrasını əhatə edən mərhələlərdə bu istiqamətdə irəliləmək mümkündür.

“Amma hər şeydən əvvəl, birinci strateji dövr üçün, Azərbaycanda bazarın fundamental əsasları formalaşdırılmalıdır. Biz artıq bu strateji mərhələləri dərk etmişik və onları idarə etməyi bacarmalıyıq”, – deyə o qeyd edib.

“Regional birjaya çevrilmək deyəndə Qafqaz bölgəsi və qismən Asiyaya yaxın əraziləri nəzərdə tuturuq. Bütün Mərkəzi Asiyanı demək olmaz, çünki bu bölgə hələ uzaq perspektivdədir və daha çox zaman tələb edir. Burada böyük potensiala malik birjalar fəaliyyət göstərir. Bu mərhələyə çatmaq üçün uzunmüddətli strategiyalardan istifadə etmək lazımdır”, – sədr əlavə edib.

Hazırda Bakı Fond Birjası İstanbul birjası ilə hansısa əməkdaşlıq üzərində işləmir, amma gələcəkdə bunun üzərində işlənilə bilər.

R.Xəlilovun sözlərinə əsasən, İstanbul birjasına qoşulmaqla bağlı gələcəkdə “cross listing” və “dual listing” məsələlərinə baxıla bilər.

“Biz hazırda daxili bazarı inkişaf etdirmək üzərində işləyirik. Birinci növbədə, daxili bazar inkişaf etməlidir ki, bu birjaya qoşulmağı nəzərdən keçirə bilək. Hazırda Bakı Fond Birjası Abu-Dabi Fond Birjasına məxsus “Tabadul hub”a qoşulmaq üzərində işləyir. Bu haba qoşulandan sonra digər birjalarla əməliyyatlar həyata keçirmək olar. Amma İstanbul birjası “Tabadul hub”a qoşulmaq üzərində işləmir, çünki bu birja kifayət qədər böyükdür”, – o qeyd edib.

Xatırladaq ki, “cross listing” (çarpaz siyahıyaalma) bir şirkətin əsas bazardan başqa, başqa bir ölkənin fond birjasında da səhmlərinin ticarətə açılmasıdır. “Dual listing” (ikiqat listinq) isə iki ayrı ölkənin birjalarında eyni vaxtda qeydiyyatda olan iki müstəqil şirkətin birləşərək vahid biznes kimi fəaliyyət göstərməsi, lakin hər iki birjada ayrıca qeydiyyatda qalmasıdır.