Sentyabr ayından ictimai mazakirələrə başlayacağıq.

Bunu Dövlət İmtahan Mərkəzinin İdarə Heyətinin sədri Məleykə Abbaszadə 2024-cü ildə keçirilən ali təhsil müəssisələrinin magistratura və rezidentura səviyyələrinə tələbə qəbulu imtahanlarının nəticələrinin elmi-statistik təhlili ilə bağlı təşkil olunan müzakirələrin yekunu ilə bağlı keçirilən brifinqdə deyib.

“Belə bir qərara gəlmişik ki, hər ay bizə verilən suallardan daha çox maraqlıları seçib ayda 1 gün ictimai müzakirələr aparaq. Hər ay mövzular fərqlənəcək. Sentyabr ayından ictimai mazakirələrə başlayacağıq. Bu da bizim işimizin daha da şəffaflığını təmin edəcək”, – deyə DİM sədri əlavə edib.

Ali məktəblərə qəbul planı haqqında bəhs edərkən DİM rəsmisi bildirib ki, bu il qəbul planı 90 faizdən artıq dolacaq.

O qeyd edib ki, subbakalavrların qəbul qaydalarında hər hansı dəyişiklik yoxdur:

“Bu il ali məktəblərdə özəl əsaslı sifarişli yerlərin 90% dolacağı gözlənilir. Ənənəvi olaraq plan yerləri 90% faiz dolur, 93-95% isə dövlət sifarişli yerlər dolur.”.

DİM rəhbəri qeyd edib ki, hələlik abituriyentlərin maraqları ənənəvi olaraq qalır. Hər il olduğu kimi, bu il də I və III qruplara üstünlük verilir.

IV qrupda kütləvilik müşahidə olunmur. Lakin məhz bu qrupu seçənlər arasında ilin ən savadlı abituriyentləri yer alır.

”Qalan abituriyentlər isə daha çox biliyinə güvəndiyi, qəbul plan yerlərinin çox olduğu qrupları seçirlər. Bu da onların ali məktəbə qəbul olunmaq ehtimalını artırır”, – deyə o əlavə edib.

Dövlət İmtahan Mərkəzinin şöbə müdiri Natiq Əliyev “2024-cü il üçün ali təhsil müəssisələrinin magistratura səviyyəsinə tələbə qəbulu imtahanlarının nəticələrinin elmi-statistik təhlili ilə bağlı müzakirələr zamanı deyib ki, magistraturaya qəbul imtahanlarında hazırda nəsə dəyişiklik nəzərdə tutulmayıb.

Onun sözlərinə görə, DİM imtahanların məzmununda hər hansı dəyişiklik olanda, 2 il öncədən məlumat verilir.

“Ola bilər ki, gələcəkdə magistraturaya qəbul imtahanında esseyə minimal bal tələbi qoyulsun”, – qeyd edib.

N.Əliyev həmçinin, magistraturada təhsil alan şəxslərin həm də əmək bazarında olacağını diqqətə çatdıraraq qeyd edib ki, yaxşı olardı universitetlərdə bu təhsil pilləsi üçün dərslər axşam saatlarında keçirilməsi məqsədəuyğundur.

M. Abbaszadə qeyd edib ki, ölkəmizdə Rəqəmsal İnkişaf və Nəqliyyat Nazirliyinin həyata keçirdiyi “Açıq Data” layihəssində DİM-də iştirak edir.

“İlin sonuna qədər 22 data ictimaiyyətə açıq formatda təqdim olunacaq. İyulun sonuna qədər bu datalardan 13-ü yerləşdiriləcək, ilin sonuna qədər isə bütün 22 data ictimaiyyətlə paylaşılacaq”- deyə o əlavə edib.