Dövlət İmtahan Mərkəzinin imtahan proseslərinə müdaxilə qeyri-mümkündür.

Bunu Dövlət İmtahan Mərkəzinin İdarə Heyətinin sədri Məleykə Abbaszadə 2024/2025-ci tədris ili üçün ali təhsil müəssisələrinin bakalavriat səviyyəsinə tələbə qəbulu imtahanlarının nəticələrinin elmi-statistik təhlili ilə bağlı tədbirdə çıxışı zamanı deyib.

“DİM-in apardığı işlər çox ciddi şəkildə həyata keçirilir. Bu fəaliyyətin təməli 1994-cü ildən qoyulub. Apardığımız işlərin nəticələri heç bir şəxsin iradəsindən asılı deyil. Bu prosesdə biz insan faktorunu tamamilə aradan qaldırmışıq. Proseslərə mənim özümün belə müdaxilə etməyim qeyri-mümkündür”,- deyə o əlavə edib.

DİM sədri qeyd edib ki, hər bir testin şəxsiyyət vəsiqəsi var: “Biz bilirik ki misal bu testi 70 faiz cavab verməlidir. Bu isə daha çətindir 25 faiz cavab verməlidir”.

O qeyd edib ki, ötən il 5 mindən çox subbakalavr ali məktəbə imtahansız qəbul edilib.

“Biz bu il belə bir təkliflə çıxış etdik ki, müəyyən ixtisasları 5-ci qrupa daxil edək. Onlar da attestat balı ilə ali məktəblərə qəbul olsunlar. Amma bu layihə həyata keçmədi. Bu müzakirə mövzusu kimi qalır və qəbul edilmədi”, – deyə o əlavə edib.

Məleykə Abbaszadənin sözlərinə görə, keçən il 5 mindən çox subbakalavr ali məktəbə imtahansız qəbul edilib.

“Subbakalavrların tədris prosesinə qoşulması ali məktəblərdə problem yaradır. Onlardan hər hansı bir nəticə əldə etmək çox çətin olur”,- deyə o əlavə edib.

DİM sədri qeyd edib ki, ali təhsil müəssisələrinə qəbul olunanların 46,69 faizi dövlət sifarişi ilə təhsil ala biləcək.

“Bu il dövlət sifarişli yerlərin sayı 2 faiz artıb. Onların 53,31 faizi isə ödənişli əsaslarla təhsil alma şansı əldə edəcəklər. Müşahidələrimiz göstərir ki, yüksək nəticə göstərənlərin böyük əksəriyyətinin valideynlərindən biri müəllimdir. Həmin valideynlər xüsusilə də riyaziyyat müəllimləri olur “, – deyə o əlavə edib.

IV ixtisas qrupuna gələn abituriyentlərin əksəriyyəti yalnız tibb ixtisaslarını seçmək niyyətində olurlar.

“Biz istəyirik ki, bu qrupa yalnız tibb deyil, eyni zamanda ekologiya, baytarlıq və qida texnologiyaları sahələri ilə maraqlanan şəxslər də yönəlsinlər”,- deyə Məleykə Abbaszadə vurğulayıb.

DİM-in gələcək planları haqda bəhs edərək DİM rəhbəri bildirib ki, təxminən 5 ilə bəzi ixtisaslar ləğv olunacaq.

“Bəzi sahələrdə işləyən şəxslər var. Onlar konkret olaraq hər gün eyni işi görən, müəyyən cədvəl işi ilə məşğul olan peşə sahibləridir. Bu ixtisaslar təxminən 5 ilə ləğv olunacaq”,- deyə o əlavə edib.

Qeyd edək ki, tədbirin ilk günü ali təhsil müəssisələrinin bakalavriat səviyyəsinə tələbə qəbulu imtahanlarının nəticələrinin müzakirəsi həyata keçirilib.

Tədbirə gələn qonaqlar əvvəlcə DİM-də yaradılmış və ölkəmizin milli qiymətləndirmə sisteminin tarixini əks etdirən muzeylə tanış olublar. Daha sonra “Abituriyent” jurnalının nəşrlərinə dair sərgiyə baxış keçirilib.İştirakçılara, eyni zamanda yazı işlərinin yoxlanılma texnologiyası və DİM-in Gənc psixometrik təcrübə proqramı haqqında məlumatlar təqdim olunub.

Tədbiri giriş sözü ilə açan ölkədə keçirilən müxtəlif səpkili imtahanların ayrı-ayrı istiqamətləri və çoxsaylı parametrləri üzrə elmi-statistik təhlillərin aparıldığını qeyd edib.

M.Abbaszadə bu imtahanların nəticələrinin təhlillərinin hamı üçün açıq və DİM‑in internet saytında yerləşdirilərək ictimaiyyətə təqdim olunduğu qeyd edib. Sədr bildirib ki, aparılan elmi-statistik təhlillər ölkə təhsilindəki müsbət təmayülləri üzə çıxarır, eyni zamanda təhsildəki problem və çatışmazlıqları da göstərir, onların aradan qaldırılması ilə bağlı müvafiq təklif və tövsiyələr irəli sürür.

Qeyd edək ki, müzakirələr iyulun 15-də buraxılış, iyulun 16-da magistratura və rezidentura səviyyələrinə, həmçinin orta ixtisas təhsili müəssisələrinə qəbulun nəticələrinin təhlilləri ilə davam etdiriləcək.