Riyaziyyat fənnindən sertifikasiya imtahanında zəif nəticə göstərən müəllimlərin 44 faizi hansı universitetin məzunlarıdır?

Elm və təhsil naziri Emin Əmrullayev “Sertifikatlaşdırma 2025: peşəkar müəllim – keyfiyyətli təhsil” mövzusunda keçirilən tədbirdə bildirib ki, Riyaziyyat fənnindən sertifikasiya imtahanında zəif nəticə göstərən müəllimlərin 44 faizi Beynəlxalq Universitetin məzunlarıdır.

O bildirib ki, zəif nəticə göstərən müəllimlərin məzunu olduqları universitetlərin çoxu hazırda ya fəaliyyət göstərmir, ya da müəllim hazırlamırlar:

“Zəif nəticə göstərən müəllimlərin bitirdiyi universitetlərə Kirovabad Dövlət Universiteti, Gəncə Dövlət Pedaqoji Universiteti, Azərbaycan Texniki Universiteti və Bakı Dövlət Universitetinin Şəki filialı daxildir”.

Sertifikasiya prosesində riyaziyyat fənni üzrə ən yüksək nəticələr Siyəzən, Sumqayıt, Xaçmaz, Mingəçevir və İsmayıllıdan olub.

“Riyaziyyat fənni üzrə elə bölgələr var ki, orada nəticələri zəif olan müəllimlər fəaliyyət göstərir. Belə hallarda bəzi məktəblərdə 5 müəllimdən yalnız 1-i növbəti tədris ilində riyaziyyat fənnini tədris etməyə davam edə biləcək”, – deyə nazir qeyd edib.

Nazir bildirib ki, sertifikasiyada xarici dil müəllimlərindən 12%-i uğur qazana bilib, 1657 nəfərin əmək müqaviləsinə xitam verilib.

“Orta balı aşağı olan 15 rayon, şəhər mövcuddur. Məsələn, Astarada hər 3 müəllimdən biri ilə yolumuzu ayırmalı olduq. Həmin müəllimləri biz yeni müəllimlərlə əvəz edəcəyik və inanırıq ki, gələcək nəticələr də yaxşı olacaq”, – deyə nazir əlavə edib.

E. Əmrullayev kimya fənnindən sertifikasiya imtahanında iştirak edən müəllimlərin narazılıqları ilə bağlı məsələyə aydınlıq gətirilib.

“Biz imtahanlardan sonra testləri təhlil edirik. Bu, o demək deyil ki, kimsə bərk qışqırsa, biz ondan qorxacağıq. Aidiyyəti olmayan adamın birdən-birə fəallaşmasını, sertifikasiya imtahanına qarşı çıxmasını anlamıram. 20 min müəllimi sertifikasiyadan keçirmişik. Onlardan 5-i imtahana telefon keçirmək istəyib. Biz telefonu alıb onları imtahandan kənarlaşdırmışıq. Bu, o demək deyil ki, sertifikatlaşma prosesi düzgün deyil. Kimya fənninə gəlincə isə, 350 nəfər yüksək bal toplayıb. Biz yavaş-yavaş test şkalalarına keçirik. Bunu zamanla hamı öyrənəcək”.

Azərbaycan dili və ədəbiyyat müəllimlərinin sertifikasiya imtahanı üzrə ekspertlərin apardıqları təkrar qiymətləndirmə, elmi-metodik və psixometrik təhlil nəticəsində imtahanda istifadə edilmiş 3 sual iştirakçıların lehinə olmaqla qiymətləndirmədən çıxarılıb.

Nazirin sözlərinə görə, Azərbaycan dili üzrə 1 sual, ədəbiyyat üzrə 2 sual olub:

“22 nəfərin nəticəsi 0–29 aralığından 30–50 bal aralığına keçir. 24 nəfərin nəticəsi 30–50 aralığından 51+ aralığına keçir”.

Azərbaycanda rus bölmələrinin bağlanması ilə bağlı şaiyələri şərh edərək nazir bildirib ki, bu məsələ gündəmdə deyil.

“Biz istəyirik ki, şagirlər xarici dillə yanaşı, Azərbaycan dilini yaxşı bilsin. Buna baxmayaraq, bizim rus dili ilə bağlı çatışmazlıqlarımız var. Müəllimlərin işə qəbulu prosesində rus bölməsi üzrə müəllim olmaq istəyən namizədlərin maksimum balı 50-60 arasıdır. Azərbaycan bölməsi üzrə isə 80-dən yuxarıdır. Buna görə də rus bölməsinə məcbur qalıb yarıbayarı nəticə göstərən müəllimi işə götürürük, çünki başqası yoxdur”, – o qeyd edib.

Nazirin sözlərinə görə, rus bölməsi məktəblərində kefiyyət sürətlə aşağı düşür.

“Bunun səbəbi isə müəllimdir. Azərbaycanda bütün məktəblər Azərbaycan məktəbidir və bu məktəblərdə oxuyanlar hansı sektorda oxumasından asılı olmayaraq, Azərbaycan dilini mükəmməl bilməlidir”, – o qeyd edib.

Nazir bildirib ki, müəllimlərin sertifikasiya imtahanlarının nəticələri göstərir ki, vaxtilə kolleclərdə təhsil almış müəllimlərin nəticələri zəifdir.

“Bu səbəbdən kolleclərdə müəllim hazırlığı dayandırılıb. Lakin onu da qeyd etməliyik ki, kollec məzunları arasında yüksək nəticə göstərən müəllimlər də var. Onlar illər ərzində öz üzərində çalışan və peşəkarlığını artıran şəxslərdir”, – deyə nazir vurğulayıb.