“Naxçıvan Muxtar Respublikasının Konstitusiyasında dəyişikliklərin təsdiq edilməsi haqqında” qanun layihəsində önəmli dəyişikliklər edilib.

Milli Məclisin bu gün keçirilən iclasında müzakirə olunan “Naxçıvan Muxtar Respublikasının Konstitusiyasında dəyişikliklərin təsdiq edilməsi haqqında” qanun layihəsində Naxçıvan Ali Məclisinin sədrinin Naxçıvan Muxtar Respublikasının ali vəzifəli şəxsi sayılmayacağı ilə dağlı məsələ öz əksini tapıb.

Mövcud qanunvericiliyə görə, Naxçıvan MR-in ali vəzifəli şəxsi Naxçıvan MR Ali Məclisinin sədridir. Sözügedən maddədə Naxçıvan MR-in ali vəzifəli şəxsinin səlahiyyətləri də əksini tapıb. Qanun layihəsində həmin maddənin ləğv edilməsi təklif olunur.

Bununla yanaşı Naxçıvan Muxtar Respublikası Ali Məclisi sədrinin səlahiyyətləri artırılır.

Qanun layihəsinə əsasən, sədrə aşağıdakı səlahiyyətlər veriləcək:

• Naxçıvan MR Ali Məclisinə seçkilərin təyin edilməsi üçün Azərbaycan Prezidentinə təkliflər verir;
• Naxçıvan MR-in dövlət və ictimai siyasi həyatının mühüm məsələləri barədə Naxçıvan MR Ali Məclisinə məlumat verir;
• Naxçıvan MR-i xarici dövlətlərlə və beynəlxalq təşkilatlarla, habelə başqa fiziki və hüquqi şəxslərlə münasibətdə təmsil edir;
• Naxçıvan MR-də yerli icra hakimiyyətləri başçılarının vəzifəyə təyin edilməsinə dair Azərbaycan Respublikasının Prezidentinə təqdimat verir;
• Naxçıvan MR-in dövlət orqanlarında qulluq (xidmət) keçən şəxslərə ixtisas dərəcələrinin və ali xüsusi rütbələrin verilməsinə dair Azərbaycan Respublikasının Prezidentinə təkliflər verir;
• Naxçıvan MR-in dövlət təltifləri ilə təltif edir, Azərbaycan Respublikasının dövlət təltifləri ilə təltif edilmə haqqında Azərbaycan Respublikasının Prezidentinə təkliflər verir.

Qanun layihəsi səsverməyə qoyularaq üçüncü oxunuşda qəbul edilib.

Eyni zamanda Naxçıvan Muxtar Respublikası Ali Məclisinin sədrinin seçilməsinə dair tələblərdə dəyişir.

Mövcud qanunvericiliyə görə, Naxçıvan MR-in ərazisində beş ildən az olmayaraq daimi yaşayan, başqa dövlətlər qarşısında öhdəliyi olmayan, ali təhsilli, ikili vətəndaşlığı olmayan Naxçıvan MR Ali Məclisinin hər bir deputatı Naxçıvan MR Ali Məclisinin sədri seçilə bilər.

Təklif edilən dəyişikliyə əsasən, Naxçıvan MR Ali Məclisinin ali təhsilli hər bir deputatı Naxçıvan MR Ali Məclisinin sədri seçilə biləcək.

Milli Məclisin bu günki iclasında həmdinin Naxçıvan Muxtar Respublikası Nazirlər Kabinetinin səlahiyyətlərinin artırılması məsələsidə gündəmə gətirlib.

Qanun layihəsinə əsasən, Naxçıvan MR Nazirlər Kabineti muxtar respublikanın dövlət büdcəsində icra hakimiyyəti üçün nəzərdə tutulmuş xərclər çərçivəsində Azərbaycan Respublikasının Prezidentinin razılığı ilə mərkəzi icra hakimiyyəti orqanlarını yaradacaq və ləğv edəcək.

Həmçinin bu Konstitusiyaya uyğun olaraq Naxçıvan MR-də icra hakimiyyətini həyata keçirməsindən irəli gələn məsələləri, həmçinin Azərbaycan Respublikası Prezidentinin onun səlahiyyətlərinə aid etdiyi digər məsələləri həll edəcək.

Yuxarıda qeyd edilən və digər dəyişiklikləri əks edən Qanun layihəsi səsverməyə qoyularaq üçüncü oxunuşda qəbul edilib.