Jurnalistika ixtisasının adının və tədris proqramının müasir tələblərə uyğun şəkildə yenilənməsi barədə təklif səsləndirilib.

Təklifi Bakı Dövlət Universitetinin professoru, Əməkdar jurnalist Qulu Məhərrəmli “Medianın inkişafında Ümummilli Lider Heydər Əliyevin rolu” adlı konfrans çərçivəsində baş tutan dəyirmi masada təqdim edib.

O bildirib ki, jurnalistika fakültəsinə birinci kursda daxil olan tələbələr adətən romantik düşüncələrlə gəlirlər. Lakin bir müddət sonra anlayırlar ki, bu sahədə romantik yanaşmadan uzaqlaşıb, reallıqları obyektiv şəkildə çatdırmaq mümkündür.

Q. Məhərrəmli təklif edib ki, jurnalistika ixtisasının adı və tədris proqramı müasir tələblərə uyğun şəkildə yenilənməlidir.

Onun fikrincə, sahənin sürətlə dəyişməsi, rəqəmsal medianın inkişafı və jurnalistdən gözlənilən bacarıqların artması bu dəyişikliyi zəruri edir. Klassik fənlərlə müasir jurnalisti yetişdirmək çətinləşdiyindən, proqram həm nəzəri bilikləri, həm də praktiki bacarıqları əhatə etməli, istiqamətlər dəqiq müəyyənləşdirilməlidir.

O hesab edir ki, “Jurnalistika” adının “Kommunikasiya və jurnalistika” kimi daha geniş və əhatəli bir anlayışla əvəzlənməsi bu sahədəki dəyişiklikləri daha dolğun ifadə edər və ixtisasın məzmununa uyğun olar.

Konfrans çərçivəsində baş tutan dəyirmi masada çıxışı zamanı Bakı Dövlət Universitetinin Jurnalistika fakültəsinin dekanı, MEDİA-nın Müşahidə Şurasının üzvü Vüqar Zifəroğlu deyib ki, Jurnalistika fakültəsinin tədris proqramı dəyişməlidir.

“2025-ci ildən jurnalistika ixtisasının tədris proqramında mühüm dəyişikliklər gözləyirəm. Proqram müasir dövrün tələblərinə cavab verməlidir. Bu, təkcə texnoloji yeniliklərə uyğunlaşma ilə məhdudlaşmır, eyni zamanda informasiya cəmiyyətinin çağırışlarına, yeni peşə standartlarına və jurnalistikanın transformasiyasına cavab verən bir yanaşma tələb edir”, – deyə V. Zifəroğlu vurğulayıb.

Media savadlılığının vacibliyinə toxunan dekan bu sahədə ixtisaslaşmaya ehtiyac olduğunu bildirib:

“Jurnalistika fakültəsində artıq media savadlılığı fənni tədris proqramına daxil edilib. Lakin bu kifayət deyil. Media savadlılığı üzrə ixtisaslaşma olmalıdır ki, bu sahədə mütəxəssislər yetişdirilsin və onlar orta məktəblərdə, universitetlərdə dərs keçsinlər. Qərbi Avropada media savadlılığı 1940-cı illərin sonlarından, Türkiyədə isə 1970-ci illərin ortalarından etibarən orta məktəblərdə tədris olunur. Bu gün dezinformasiya geniş yayılır. Bunun qarşısını almağın effektiv yolu media savadlılığının tədrisə inteqrasiya edilməsidir. Belə olan halda auditoriya həm etibarlı məlumat mənbələrini ayırd etməyi, həm də aldığı informasiyanı analiz etməyi bacaracaq. Bu, dezinformasiyanın yayılmasının qarşısını da müəyyən mənada alacaq. Yəni artıq media savadlılığı təkcə jurnalistlər üçün deyil, cəmiyyətin bütün üzvləri üçün zərurətə çevrilib. Bu səbəbdən də gələcək jurnalistlərə bu sahənin ayrıca öyrədilməsi vacibdir”.

O, əlavə edib ki, müasir medianın sürətlə dəyişdiyi bir dövrdə ənənəvi tədris metodları ilə irəliləmək mümkün deyil və proqramların yenilənməsi, tələbələrin rəqəmsal bacarıqlarının inkişaf etdirilməsi əsas hədəflərdən biri olmalıdır.