Gecə yarısı müayinə başa çatıb. Meyitləri müayinə etməmişdən əvvəl ölüm haqqında şəhadətnamələr qohumlara təqdim olunub.

Trend-in verdiyi məlumata əsasən, şəhadətnaməyə əsasən böyük qardaşın ölüm səbəbi travma göstərilib. Amma kiçik qardaşda ürəktutması qeyd olunub.

Bunu Rusiyada qətlə yetirilən azərbaycanlılarla bağlı ekspertizanın nəticələrinə dair mətbuat konfransında Məhkəmə Tibbi Ekspertiza və Pataloji Anatomiya Birliyinin baş direktoru Ədalət Həsənov deyib.

Qeyd olunub ki, kim tərəfindən öldürülməsi ilə bağlı məlumat yoxdur. Hüseyn Səfərovun meyiti müayinə edərkən çoxlu sayda travma aşkar olundu.

“Döş qəfəsi deformasiyaya uğrayıb, üst və alt dodaqların selikli qişasında qançırlar, alnın sol və sağ qaşüstü nahiyəsində cızıqlar, yuxarı ətraflarda əllərin arxa səthində qançılar, xayalarda qançırlar, sol budun iç səthinin zolaq şəkilli sıyrığı qeydə alınıb”.

Ə.Həsənov qeyd edib ki, bir dəfə müayinə olunan meyitin ikinci dəfə müayinə olunması çox çətindir.

“Meyitin daxili müayinəsi zamanı başın dərisinin iç səthində qansızma, beynin sərt və yumşaq qişada qansızma, çox sayda yerdəyişmə sınıqlar qeydə alınıb. Diafraqmada qansizmalar var idi. Küt travmalar zamanı ya qaraciyər ya da dalaq cırılır. Mən hansı orqanda cırılma olduğunu dəqiq deyə bilmirəm. Biz Səfərov Hüseyn Mehdi oğlunun meyitinin müayinəsi zamanı ölüm səbəbi olaraq yuxarıda qeyd edilən səbəblərdən post travmatik şok olaraq qeydə aldıq”.

Onun sözlərinə görə, Ziyəddin Səfərovun meyitində hər iki gözdə qansızma, boyunun sol və sağ hissəsində qansızma, sol çiyin üstü nahiyədə qançır və sıyrıqlar, qarnın yan səthində qançırlı sıyrıqlar, döş qəfəsinin travması və sıxılması qeydə alınıb.

“Hətta qabırğalardan birini tapa bilmirdik. Onurğanın döş qəfəsində yumşaq toxumalarda qansızmalar qeydə alınıb. Ölümə səbəb qeyd edilən çoxsaylı xəsarətlərlə əlaqədar baş vermiş ağır post travmatik şok olub”.

Qeyd edək ki, ötən ayın 27-də səhər saatlarında Rusiyanın Federal Təhlükəsizlik Xidməti Yekaterinburq şəhərində azərbaycanlıların yaşadığı evlərə basqın edib. Basqın zamanı 2 azərbaycanlı Ziyəddin və Hüseyn Səfərov qardaşları öldürülüb, bir neçə nəfər saxlanılıb.