Alternativ müalicə üsullarına aldanmayın – sağlamlıqla bağlı qərarlar elmi əsaslara söykənməlidir.

Səhiyyə Nazirliyinin mütəxəssis-eksperti, terapevt Zakir Quliyev yerli radiokanallardan birinə verdiyi müsahibədə alternativ müalicə metodlarının populyarlaşmasının səbəblərindən danışarkən deyib ki, bir çox insan təbii və zərərsiz hesab etdiyi üsullara üstünlük verir.

“Sosial şəbəkələrdə yayılan fərdi təcrübələr elmi sübutlara əsaslanmasa belə, insanlara cəlbedici görünür. Bəzən bu metodlar daha ucuz, əlçatan və psixoloji baxımdan rahat görünə bilər. Amma onların əksəriyyəti elmi əsaslara söykənmir. Nəticədə düzgün tətbiq olunmadıqda vaxt itkisi, səhv diaqnoz və hətta ciddi sağlamlıq problemləri ilə üzləşdirir”.

Zakir Quliyev hər kəsi sağlamlıqla bağlı qərarlarda diqqətli olmağa çağırıb və qeyd edib ki, istənilən müalicə üsuluna başlamazdan əvvəl mütləq həkimlə məsləhətləşmək lazımdır. Duyğulara deyil, elmi biliklərə əsaslanan qərarlar uzunmüddətli sağlamlığın təminatıdır.

Ekspert yeni reallıqlardan bəhs edərək elektron resept sistemindən danışıb və bildirib ki, elektron resept sistemi həkim, pasiyent və aptek arasında əlaqəni daha şəffaf və təhlükəsiz edir:

“Bu sistem dərmanların düzgün istifadəsini təmin edir, özbaşına dərman qəbulunun qarşısını alır. Artıq reseptlər rəqəmsal sənəd kimi təqdim olunur, saxtakarlıq halları istisna edilir və dərman yalnız həkim göstərişi ilə təyin olunur”.

Zakir Quliyevin sözlərinə görə, sistem xroniki xəstələr üçün təkrar reseptləri asanlaşdırır, eyni zamanda dərmanların qarşılıqlı təsir riskini azaldır və yanlış istifadənin qarşısını alır.
Mütəxəssis əlavə edib:

“Elektron resept təkcə texnoloji yenilik deyil, səhiyyə sistemində əsaslı islahatların vacib hissəsidir. Vətəndaşların bu sistemə düzgün yanaşması gələcəkdə daha geniş rəqəmsal səhiyyə həllərinin tətbiqinə zəmin yaradacaq”.