Qarşıdan gələn bayram və tətil günlərində qidalanma məsələsində xüsusilə diqqətli olmaq lazımdır. Çünki bu dövrdə qeyri-nizamlı və həddən artıq qida qəbulu halları daha çox müşahidə olunur.

Səhiyyə Nazirliyinin rəsmi İnstaqram hesabında canlı yayımda Səhiyyə Nazirliyinin mütəxəssis-eksperti, qastroenteroloq Emin Məmmədov bildirib ki, bu da tez-tez şişkinlik, kökəlmə, qəbizlik, qaraciyər və mədəaltı vəz yağlanması, şəkər və xolesterin səviyyəsində yüksəlmələrlə nəticələnə bilər.

“Bayram günlərində sağlam qidalanmanı qorumaq üçün öncədən plan qurmaq çox vacibdir. Yemək saatlarını əvvəlcədən müəyyənləşdirmək, səhər yeməyini atlamamaq və gün ərzində fasilələrlə, amma nəzarətli şəkildə qidalanmaq bu baxımdan faydalıdır. Bayram süfrəsində ağır və yağlı yeməklərin yanında lifli tərəvəz salatlarına, yoğurt əsaslı məzələrə, təbii şirələrə və bol suya yer vermək lazımdır. Qızartmalar və un məmulatlarını az qəbul etmək, desertləri isə əsas yeməkdən sonra ən az 2 saat sonra qəbul etmək daha məqsədəuyğundur. Şirniyyata tamamilə qadağa qoymaq əvəzinə miqdarına nəzarət etmək daha real və davamlı yanaşmadır”, – o, qeyd edib

E.Məmmədov bildirib ki, tətil günlərində aktivlik də qidalanma qədər vacibdir və gündəlik olaraq 20-30 dəqiqəlik gəzinti belə, orqanizmin enerjini sərf etməsi və qan dövranının yaxşılaşması üçün kifayət edə bilər.

“Məsləhət görərdim ki, şəkər, təzyiq, xolesterin və qaraciyər xəstəlikləri olan şəxslər bu günlərdə həkim tövsiyələrinə əməl etməli, dərmanlarını vaxtında qəbul etməli və xüsusilə duzlu, yağlı və şəkərli qidalardan uzaq dursunlar. Bu sadə qaydalar sayəsində bayram günlərini həm zövqlü, həm də sağlam şəkildə keçirmək mümkündür”.

Gün ərzində neçə dəfə yeməyin düzgün olduğu məsələsi insanın yaşından, həyat tərzindən, sağlamlıq vəziyyətindən və hətta fəsillərə görə dəyişə bilər.

Ekspertin sözlərinə görə, ümumilikdə isə sağlam bir insan üçün gün ərzində 3 əsas dəfə qidalanmaq daha məqsədəuyğundur:

“Bu rejim həm maddələr mübadiləsini aktiv saxlayır, həm də qan şəkərinin stabilliyinə kömək edir. Az-az, lakin tez-tez yemək mədə-bağırsaq sistemini yormadan, orqanizmi daimi enerji ilə təmin edir. Xüsusilə reflüks, şəkərli diabet, öd daşı xəstəliyi kimi problemləri olan şəxslər üçün bu cür qidalanma rejimi daha uyğundur. Əgər insanın hər hansı xroniki xəstəliyi yoxdursa, oturaq həyat tərzi keçirmirsə və porsiyalar balanslıdırsa, gündə 3 əsas yeməklə də kifayətlənmək mümkündür. Qidalanma tezliyi ilə yanaşı, yeməklərin keyfiyyəti və tərkibi də olduqca önəmlidir”.

Mütəxəssis-ekspert bildirib ki, fəsillər də orqanizmin qida ehtiyaclarını dəyişir:

“Yay aylarında havanın temperaturu yüksək olduğu üçün iştah azalır, orqanizm daha çox maye və yüngül qidalar tələb edir. Belə günlərdə tez-tez ağır yeməklər yemək orqanizmdə narahatlıq, tərləmə və həzm pozğunluqları yarada bilər. Yayda daha çox tərəvəz, meyvə, süd məhsulları və bol su qəbul etmək tövsiyə olunur. Qış aylarında isə maddələr mübadiləsi bir qədər yavaşladığı üçün orqanizm daha çox enerji və qida tələb edir. Iştaha artır və doyumlu, isti yeməklərə meyl artır. Lakin bu dövrdə də qida miqdarını deyil, keyfiyyətini və balansını qorumaq daha vacibdir”.