Azərbaycanda ehtimal olunan dələduzluq (fraud) hallarına qarşı mübarizədə mərkəzləşdirilmiş platforma təqdim ediləcək.

Azərbaycan Mərkəzi Bankı (AMB) sədrinin müşaviri Akif Bağırov bu gün Bakıda keçirilən tədbirlərdən birində çıxışı zamanı deyib ki, AMB gələcəkdə fraud hallarına qarşı mübarizənj mərkəzləşdirilmiş bir platforma üzərindən etməyə hazırlaşır.

“Hazırda biz kollaborativ şəkildə müvafiq dövlət qurumları ilə də bu məsələni aktiv müzakirə edirik. Mərkəzi Bank tərəfindən bu istiqamətdə mərkəzləşdirilmiş platformanın təqdim olunması planlaşdırılır ki, fərqli bank və maliyyə institutlarında baş vermiş fraud halının mərkəzləşdirilmiş şəkildə məlumat mübadiləsi baş versin. Mərkəzləşdirilmiş platforma üzərindən məlumatlar xüsusi dövlət strukturlarına ötürüləcək ki, müvafiq administrativ tədbirlər görülsün”.

AMB fraud tənzimləmə mexanizmi üzərində də işlər aparır. Burada əsas diqqət fraud hadisələrin baş vermə ehtimalı olan bazar iştirakçıların əvvəlcədən belə hadisələrə hazır olmasına yönəlib. Yəni kibertəhlükəsizlik üzrə tərtib edilən mexanizmin eynisini fraud üzrə də həyata keçirmək planlaşdırılır.