İranın hava məkanında tətbiq olunan uçuş qadağasının müddəti uzadılıb.

IRNA agentliyinın İranın Mülki Aviasiya Təşkilatına istinadən verdiyi məlumata əsasən, ölkənin hava məkanında tətbiq olunan uçuş qadağasının müddəti 20 iyun, saat 02:30-a qədər uzadılıb

Bundan əvvəl uçuş qadağasının müddəti 19 iyun, saat 14:30-a qədər uzadılmışdı.

Qeyd edək ki, qadağa 13 iyun səhər saatlarında İsrail İrana hərbi hava zərbələr endirdikdən sonra tətbiq edilib. Zərbələr nəticəsində çoxlu sayda yüksək səviyyəli hərbçi, o cümlədən, İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb.

Elə həmin günün axşamı, İran “Həqiqi Vəd III Əməliyyatı” ilə Israilə cavab verib: Tel-Əviv daxil olmaqla bir çox yerlərə yüzlərlə ballistik raket, pilotsuz uçuş aparatı buraxılıb, bu da mülki itkilərə və genişmiqyaslı dağıntılara yol açıb.