Bir çox xroniki xəstəliyi olan insanlar isti havalarda diqqətli olmalıdırlar. Ürək-damar sistemi xəstəlikləri olan şəxslərdə yüksək temperatur qan damarlarının genişlənməsinə və təzyiqin düşməsinə səbəb ola bilər. Bu isə ürək döyüntülərinin artmasına, ürəyin yükünün çoxalmasına və infarkt riskinin yüksəlməsinə gətirib çıxara bilər.

Səhiyyə Nazirliyinin rəsmi İnstaqram hesabında canlı yayımda Səhiyyə Nazirliyinin mütəxəssis-eksperti, terapevt Zakir Quliyev onuda bildirib ki, hipertoniya və hipotoniya xəstələri üçün də isti hava təzyiqin qeyri-sabitləşməsinə səbəb olaraq başgicəllənmə, ürəkbulanma, hətta huş itkisi ilə nəticələnə bilər:

“Şəkərli diabet xəstələrində susuzlaşma daha tez inkişaf edir, bu isə qanda şəkərin kəskin yüksəlməsinə və ya düşməsinə gətirib çıxara bilər. Üstəlik, bəzi diabet dərmanları və insulin bədəndə maye itkisini artırır. Xroniki tənəffüs xəstəlikləri, xüsusilə astma və xroniki obstruktiv ağciyər xəstəliyi (KOAH) olanlarda isti hava ilə birlikdə artan rütubət nəfəs darlığını artırır, tutmaların tezliyini yüksəldə bilər. Böyrək xəstəlikləri olan şəxslər isə maye-elektrolit balansının pozulmasına daha həssasdırlar, çünki bədən temperaturunun tənzimlənməsi üçün lazım olan tərləmə funksiyası onlarda böyrək yükünü artırır və bu, böyrək funksiyasının daha da zəifləməsinə səbəb ola bilər”.

Mütəxəssis-ekspert qeyd edib ki, hamilə qadınlar, yaşlı insanlar və azyaşlı uşaqların orqanizmi isə temperatur dəyişikliklərinə qarşı daha az adaptasiya qabiliyyətinə malikdir:

“Onlarda susuzlaşma, istilik iflici və digər istiliklə bağlı pozğunluqlar daha tez baş verir. Buna görə də, bu qruplara aid insanlar günün ən isti saatlarında (adətən 11:00–17:00 arası) çöldə olmamalı, bol maye qəbul etməli, yüngül və açıq rəngli geyimlər geyinməli, birbaşa günəş işığından qorunmalı və müntəzəm olaraq qan təzyiqi, qan şəkəri kimi göstəricilərini izləməlidirlər”.

Onun sözlərinə görə, günün ən isti saatları – yəni saat 11:00-dan 17:00-a qədər – uşaqların birbaşa günəş şüalarına məruz qalması təhlükəlidir:

“Bu səbəbdən, açıq havada oynamaq üçün səhər tezdən və ya axşamüstü saatları seçilməlidir. Uşaqlara yüngül, açıq rəngli və hava keçirən paltarlar geyindirilməli, başlarına papaq qoyulmalı və bədənlərinin mümkün qədər örtülü olmasına diqqət edilməlidir”.

Mütəxəssis-ekspert bildirib ki, günəş altında olduqları hallarda dəri üçün qoruyucu kremlər istifadə olunmalıdır:

“Xüsusilə də 6 ay və yuxarı yaşda olan uşaqlarda SPF 30 və ya daha yüksək qoruma təmin edən məhsullar seçilməlidir. Bol maye qəbul etmək vacibdir, çünki uşaqlar oynayarkən, bədənləri tez susuzlaşır və bu, günvurma riskini artırır. Ən əsası isə uşaqları kölgəli, sərin və ventilyasiyalı mühitlərdə saxlamaq, lazım gəldikdə onları tez-tez sərin su ilə yumaq və ya duş qəbul etdirmək həm rahatlıq, həm də təhlükəsizlik baxımından çox faydalıdır”.

Z.Quliyev sonda bildirib ki, valideynlər bu tədbirlərlə övladlarını günvurma və susuzluqdan asanlıqla qoruya bilərlər.